PDBC, Kimwa, Flying-V gisubhan og daog
CEBU, Philippines - Gisubhan dayon og daog ang team PDBC sa sikit kaayo nilang duwa batok sa MSE, 56-51 pagsugod sa Power Dealer Basketball Club (PDBC) Christmas League 2014 niadtong Miyerkules diha sa Kimwa gym sa Brgy. Subangdaku, Mandaue City.
Ang founder sa PDBC nga si Arnold de Asis maoy mipasud sa unang kuwatro puntos sa team PDBC, kinsa miposte’g 15-13 nga bentaha sa first period. Apan si Pasaol Sayson maoy nangu sa kadaugan pinaagi sa iyang 15 puntos, gisundan ni Jules Langres sa iyang 10 puntos.
Sila si Edwin Dejacto ug Moral maoy nangu sa MSE nga mikadlit og 10 puntos matag usa.
Sa laing aksiyon, ang Kimwa gisugat sab og daog batok sa Unilink Shipping, 64-53 ubos sa pagpangulo ni Cañete nga miposa’g 14 puntos.
Ang Unilink Shipping gitimonan ni Alvin Cabiluna nga miariya og 18 puntos, samtang si Junriel Cando mikabya og 16 puntos.
Gilihian sab og daog ang Flying-V batok sa Woop, 48-42.
Si El-El Bolz mitubil og 16 puntos aron pangulohan ang Flying-V, samtang sila si Marcial Fernandez ug Greg Aguilar mao sab ang topscorers sa Woop sa ilang 11 ug 10 puntos matag usa.
Ang PDBC Christmas League 2014 giorganisar ni Alner Mercado ug mga duwa gidumala sa ilang founder Arnold de Asis. Gipaluyohan kini sa Saymer Merchandise ni PDBC president Florentino Sayson. (BANAT NEWS)
- Latest
