PCCL elite 8 sugdan na

CEBU, Philippines - Kulbahinam ug puno sa aksiyon ang masaksihan sa Cebuano fans dihang ang makasaysayanon nga Cebu leg sa Philippine Collegiate Champions League (PCCL) Elite Eight Series mosikad karong adlawa sa Cebu Coliseum.

Lima sa labing maayong collegiate teams gikan sa Manila  ang makigsangka sa top three teams sa Sugbo.

Sa pasiunang duwa sa alas-5:15 sa hapon, ang bag-ong gikoronahan nga 2014 Cebu Schools Athletic Foundation Inc. (CESAFI) Southwestern University (SWU) Cobras makigsangka  sa De La  Salle University (DLSU) Green Archers.  Dayon sundan kini sa duwa tali sa CESAFI runner-up University of San Carlos (USC) Warriors ug sa UAAP Season 77 losing finalist Far Eastern University (FEU) Tamaraw sa alas-7 sa gabii.

Ang Cobras nakadaog na sa  Green Archers sa miaging tuig atol sa PCCL Final Four didto sa Manila, apan napilde ra sab sila gihapon sa maong kontra atol sa knockout finals.

  Makahimo sa  Cobras-Archers showdown nga  mas interesante mao si Ben Mbala. Si Mbala nagduwa uban sa Cobras, kinsa iyang gitabangan nga modaog og titulo duha na ka tuig ang milabay. Apan karon, usa na niya ka kontra ang Cobras.

Sa samang paagi, si Jayven Mark Tallo, ang reigning CESAFI MVP, nakaduwa sab sa La Salle duha na ka tuig ang milabay sa wala pa siya mobalik dinhi sa Sugbo ug milandig  sa gingharian sa  Cobras.

Inig Sabado, ang reigning UAAP title-holder National University (NU) Bulldogs mopakita’g aksiyon batok sa University of the Visayas (UV) Green Lancers ubos  sa  bag-o nilang coach nga si Gary Cortes hulip ni Felix ‘Donbel’ Belano.

Moduwa sab ang five-peat NCAA  champions San Beda College (SBC) Red Lions batok sa USC Warriors sa adlaw gihapon nga Sabado.

Ang ikalimang team  gikan sa Manila mao ang NCAA runner-up Arellano University (AU) Chiefs nga mopakita sa ilang abilidad karong Domingo batok sa UV Green Lancers. Sa  Lunes, ang katapusang adlaw sa PCCL pocket tournament, ang Arellano makigsangka  sa Cobras.

Si PCCL chairman Rey Gamboa maoy mo-supervise sa torneyo  uban ni kanhi national team coach Joe Lipa.

Ang mga tiket nagkantidad og P40 sa general admission, P80  sa upper box, P150  sa lower box ug P200  alang sa stage seat. (BANAT NEWS)