Perpetual mapapalaban agad sa Mapua sa NCAA volleyball
MANILA, Philippines - Bubuksan ng Perpetual Help ang pagdepensa sa mga titulo sa seniors division ng NCAA volleyball sa pagsisimula ng aksyon bukas sa Mall of Asia Arena sa Pasay City.
Ang 3-peat champion na Lady Altas ay mapapalaban sa Mapua sa alas-10 ng umaga.
Si Sinfronio ‘Sammy’ Acaylar pa rin ang coach ng koponan at ipaparada nito ang tatlong rookies sa pangunguna ng 19-anyos at 6’2 na si Lourdes Clemente ng Bulacan.
Sina Nezelle May Gual at Jowie Albert Versoza ang iba pang baguhan na sasandalan para mapunuan ang pagkawala nina MVP Honey Royce Tubino, Jane Diaz at Anne Guillermo dahil nag-graduate na.
Ang Altas na balak kunin ang ikalimang sunod na titulo ay magpaparada rin ng halos bagong koponan dahil sa paglisan nina MVP Edmar Sanchez, Glacy Diezmo at Ralph Savellano.
Bunga nito, sina Bonjomar Castel, Manuel Doliente, Waren Catipay, Rey Taneo, Neil Ytorzaita, Allan Salaan at liberong si Jack Kalingking ang mga aasahan ng Altas sa taong ito.
Hindi rin pahuhuli ang Junior Altas na may sapat na puwersa para mabawi ang titulo sa juniors division.
- Latest
