Hapee kumukutitap sa itaas
MANILA, Philippines - Naipagpatuloy ng Hapee Fresh Fighters ang pagpapanalo habang nakabangon ang Wangs Basketball mula sa huling kabiguan sa pagpapatuloy kahapon ng PBA D-League Aspirants’ Cup sa Ynares Sports Arena sa Pasig City.
Si Ola Adeogun ay may 18 puntos at walong rebounds habang si Bobby Ray Parks Jr. ay naghatid ng 10 puntos, walong rebounds at anim na assists para tulungan ang Hapee na solohin ang liderato sa 12 koponang liga sa pagsungkit ng ikatlong sunod na panalo sa 79-66 pananaig sa MJM Builders.
May 16 puntos si Mac Belo habang10 ang ginawa ni Mike Tolomia para sa MJM Builders kung saan napatalsik ang coach na si Nash Racela sa first half dahil sa dalawang technical fouls.
Hindi rin natapos ng guard na si Gryann Mendoza ang bakbakan dahil sa ikatlong yugto ay napatalsik din nang banggain ang referee bilang protesta sa tawag.
Sa pangunguna ni Adeogun ay lumayo agad ang tropa ni coach Ronnie Magsanoc sa 21-10 at nagpatuloy ang mainit na ipinakita nang hawakan ang pinakamalaking kalamangan sa laro na 20 puntos, 50-30.
Kinalos naman ng Wangs ang Racal Motors, 80-72, para makabangon mula sa 70-87pagkakadurog sa MP Hotel Warriors noong Oktubre 30.
Sina Michael Miranda at Rocky Acidre ang namuno sa 5-0 atake matapos ang huling tabla sa 67-all upang makuha uli ng Wangs ang momentum.
- Latest
