Cebuana ug Abrenica miarangkada
CEBU, Philippines – Nakarekober dayon ang Cebuana Lhuillier ug maoy ilang gipahimungtan sa ilang pagkasukamod sa miaging adlaw ang Jomangs' Surplus, 103-77 sa miaging gabii atol sa duwa sa 2014 Mayor Nice Apura Cup basketball tournament didto sa Carcar City gym.
Sa laing duwa, gilubong sab sa Abrenica Engineering ang ASPA sa iskor, 112-79 alang sa ilang ikaduhang daog. Midaog sab ang Abrenica sa miaging adlaw batok sa Cebuana Lhuillier, 103-81 samtang nakaipsot ang ASPA batok sa Jomangs, 97-95.
Si Alex Cainglet maoy nangu sa Cebuana Lhuillier sa iyang 30 puntos.
Sa laing bahin, silang Jon Michael Abad ug si Steve Cedric Akomo nga pulos taga UV, maoy nangu sa Abrenica sa ilang 33 ug 22 puntos, matag usa.
Magtakos ang ASPA ug ang Cebuana Lhuillier diin ang modaog kanila maoy makigsangka alang sa titulo ugma.
Matud pa ni Julie Flores, ang tournament director sa Mayor Nice Apura Cup, magsangka sab ugma alang sa titulo sa Inter-Barangay Above 40 Division ang Poblacion 1 batok sa Perrelos. (BANAT NEWS)
- Latest
