Larobis vs. Allied sa LABA Cage Finals

CEBU, Philippines - Gipilde sa MCC-Larobis ug sa Allied ang tagsa-tagsa nilang kaatbang aron moabante sa finals sa Los Amigos Basketball Association (LABA) Commissioner’s Cup 2014 basketball tournament niadtong Biyernes sa gabii diha sa Banilad Sports Center sa dakbayan sa Mandaue.

Ang MCC-Larobis mitagak sa MS Motosuit,  pinaagi sa pag-iskor og 92-82, samtang ang Allied mipalagpot sab sa Huskies human makabawos, 92-74.

Si Canjo Echavez mihagdaw og 19 puntos, samtang laing tulo niya ka teammates ang mihimo sab og double figures alang sa Larobis, kinsa nakarekober sa second half aron makuha ang gitinguhang luna sa finals.

Si Merot Ygonia maoy topscorer sa MS Motosuit nga miratsada’g  19 puntos, gisundan ni LABA vice president for internal Lou Ornopia ug Jerry Jacalan nga adunay 12 puntos matag usa ug Albert Ramos sa iyang 11 puntos.

Sa laing bahin, si Rowen Grafe mipa-buhagay og 25 puntos ug milangkat og siyam ka rebounds, si Domingo Recto mihakot og 19 puntos uban ang 10 ka rebounds alang sa Allied nga  yano kaayong milumpag sa depensa sa Huskies hinungdan nga nakamaneho sila paglabaw og 19 puntos,  64-45 sa hinapos nga bahin sa third quarter.

Naungot ang iskor sa Allied sa sayong bahin sa final period nga nakahigayon sa Huskies paglaslas sa labaw ngadto na lang sa sayes puntos, 60-66 sa tunga-tungang bahin sa maong kuwarter. Apan nahigmata ang Allied ug napukaw ang ilang kahilom pinaagi sa tira ni Recto.

Sukad niadto, nagmabinantayon na ang Allied  hangtod nakuha nila ang katapusang lingkoranan sa finals.

Si Richard Bathan mitikdol og 15 puntos aron pangulohan ang Huskies, sila si Eboy Quiñahan ug Richard Madrid mitimang og 14 puntos matag usa.

Ang knockout finals sa Larobis ni team owner Bax Larobis ug Allied ni Cris Martenito himuon ugma sa alas-8 sa gabii human sa duwa tali sa MS Motosuit ni team owner-playing coach Lou Ornopia ug Huskies ni Dr. Raul Monteroyo nga mag-ilog alang sa ikatulong puwesto.

Gipasiugdahan sa LABA ubos sa ilang presidente nga si Christopher Ubas, ang  gisuportahan sa Banilad Brgy. Capt. Greg B. Yap ug sa iyang mga konsehales.

Ang mga duwa gidumala ni LABA vice president for external ug Banilad barangay councilor Gilbert Sebandal. (BANAT NEWS)

PUNTOS MATAG USA

Unang duwa:

LAROBIS (92) – Echavez 19, Ouano 16, Niez 15, Chavez 11, Acusar 9, Asis 6, Aposaga 6, Pestaño 2, Duhaylungsod 2, Gelbolingo 2, Marbalo 2, Larobis 2.

MS MOTOSUIT (82) – Ygonia 17, Ornopia 12, Jer. Jacalan 12, Ramos 11, Perolino 7, Limosnero 6, Jo. Jacalan 5, Pestaño 4, Son 3, Labador 2, Celiz 2, Seno 2.

Ikaduhang duwa:

ALLIED (92) – Grafe 25, Recto 19, Cinco 8, Lesin 8, Mendoza 7, Salonoy 6, Bukiron 6, Cabucos 5, Lipon 4, Delima 2, Miñoza 2.

HUSKIES (74) – Bathan 15, Quiñahan 14, Madrid 14, Herbieto 6, Baunsit 6, Povadora 6, Cuizon 4, Monteroyo 4, Salego 2, Alburo 2, Rusiana 1.