Bullos nagpanikad na sa ONE FC
CEBU, Philippines - Ang mixed martial arts pioneer sa Sugbo nga si Cary ‘The Prince’ Bullos mangita sa iyang maayong kapalaran sa international scene sa iyang debut sa ONE Fighting Championship karong Biyernes didto sa Singapore Indoor Stadium.
Dili hinuon sayon ang sagubangon sa 31-anyos nga striker tungod kay sangkaon niya ang gikatahapang American grappler nga si Major ‘Majee’ Overall.
Si Bullos, ang bantamweight champion sa URCC sa wala pa siya napilian nga usa sa mga MMA fighter nga morepresentar sa nasud sa labing dakung MMA tournament sa Asya.
“Gawas sa physical condition, I also trained mentally for this kay bisan og veteran nako ani nga sport, lahi ni nga away tungod kay world tournament na ni,” matud pa ni Bullos sa SelDef MMA gym.
Ang 12-year MMA veteran nga si Bullos adunay rekord nga 7-1 ug makigsangka siya sa ikaduha pa lang niyang langyaw’ng kaatbang. Sa una niyang away midaog siya batok sa Japanese nga si Hideo Morikawa sa miaging tuig didto sa J Centre Mall sa URCC Cebu.
Suwayan ni Bullos nga mahimo nga labing unang Cebuano nga modaog sa ONE FC. Una nang mitunob sa ONE FC cage ang kanhi boxer nga si Joseph Omana ug Vaughn Donayre, apan pulos sila napakyas. (BANAT NEWS)
- Latest
