Ang papel sa inahan luyo sa atleta

CEBU, Philippines - Masentro kanunay sa  Milo Little Olympics ang kalampusan sa mga batan-ong atleta ug koponan sa nakadaiyang matang sa sports, apan dili usab matago ang dakung papel sa ilang mga inahan ug ang suporta nga gihatag kanila sa ilang mga anak.

Atol sa 6th Milo Little Olympics National Finals, namunga ang  paningkamot sa mga inahan sa mga atleta ug nakita kini sa kadaugan sa ilang mga anak.

Ang mga coaches ug trainers mao ang kasagaran nga naggiya sa mga atleta sa matag sports nga ilang apilan, apan ang presensiya sa ilang mga inahan maoy usa sa nakitang daku’g natampo  sa ilang kadaugan.

“It’s really very different when the mothers are present during games especially for elementary athletes. The coaches, of course, are a big help, but the kids will really look for their mothers because they're the ones who provide them an added inspiration and extra energy in every challenge they are faced with," matud pa ni Joselito Bono, ang football coach  sa Don Bosco Technology Center (DBTC).

Ang DBTC maoy misakmit sa gold sa National Finals ug si Bono mikalawat nga ang mga inahan sa iyang mga atleta daku’g natampo sa ilang kalampusan.

Gawas sa suporta, ang presensiya sa mga inahan makatabang aron mawagtang ang kulba ug pagsaka sa kompiyansa sa mga atleta.

Ang maong panghitabo napamatud-an ilabi na sa mga elementary athletes tungod sa kalinghod sa ilang pangedaron.  Nagkinahanglan sila sa ilang mga inahan nga modasig kanila sa ilang duwa.

Dili lang sa panahon sa kadaugan, ang mga atleta modangop usab sa ilang mga inahan panahon sa kapakyasan aron maibanan ang ilang  bationg kaguol.

“In the face of defeat, the kids can easily recover with their moms around. In moments that they are down, the parents especially their moms are there to console them,” matud pa ni USC-BED’s athletic coordinator Saturnino Mayormita.

Tungod niini nakita sa miaging edisyon sa Milo Olympics nga ang ilang pila na ka tuig nga programa wala lang makaani og maayong resulta sa pagpalambo sa sports grassroots program sa nasud, apan napalig-on usab niini ang pundasyon sa usa ka maayong atleta nga mao ang iyang pamilya.  (BANAT NEWS)