Alin brokers giharian, MCWD gihubsan

CEBU, Philippines - Miantug og career-high 21 puntos si Israel Alin aron pangulohan ang kadaogan sa iyang team nga Alin Brokers batok sa MCWD sa iskor, 108-97 kaniadtong Huwebes, Oktubre 30 sa nagpadayon nga 3rd season sa BOC-CIPU Friendship Cup basketball tournament didto sa barangay Tinago gym, ning dakbayan.

Tungod sa maong kadaogan, wala sab damha sa kadaghanan nga moabante sa ikatulong pwesto ang Alin Brokers kinsa nagbaton karon og 6-2 win-loss record.

    Sa sayo pa, gikunis-kunis sa MP Brokers ang Customs Task Force pinaagi sa pagkulit og tournament-record 60 puntos nga kadaogan, 124-64. Sa maong duwa, ang anak sa MP Brokers team owner Marty Pimentel nga si Nikki maoy nahimong leading scorer tungod kay nag-igo siya sa iyang mga tirada sa gawas.

Sa kasamtangan, ang ilang paghupot sa ikatulong pwesto wala damha mismo ni Alin kinsa malipayon kaayo sa ilang naabtan karon tungod kay sa mga miaging torneyo, modaog o mapilde, dili kini niya igsapayan kay mas importante alang kaniya nga dunay usa ka "physical activity" ang iyang mga players kay gawas nga makaayo kini sa panglawas, magkatigum sab kanunay ang iyang mga empleyado.

Parehong miburak og 20 puntos matag usa silang ex-USJR Jaguar Miguel Tabaloc ug Edwin Estorgio. Dili malalis nga ang pagduwa ni Tabaloc ubos sa Alin Brokers maoy usa sa hinungdan nga milig-on ang iyang team samtang midugang og 11 puntos matag usa silang Ryan Villomo ug Ryan "Dwyane Wade" Barral kinsa maoy nagpahimutang sa opensa pinaagi sa iyang mga assists ngadto kang Tabaloc sa ilawom ug ngadto kang Alin kinsa epektibo kaayo sa iyang mga medium-range jumpshots.

Sa laing bahin, gawas kang Pimentel, laing upat ka players sa MP Brokers ang mibahug sab og double figures aron moabante ngadto sa ika-upat nga pwesto sa ilang 6-3 nga baraha.

 Puntos matag usa:

First Game:

Alin Brokers (108) —   I. Alin 21, Estorgio 20, Tabaloc 20, Barral 11, Villomo 11, Cayanong 9, Lleve 8, Nudalo 2, Tradio 2, Alimoren 2.

MCWD (97) — Gaco 25, Marata 17, Cipres 16, Caga-anan 13, Chan 10, Minoza 3, Ebrado 1.

Second Game:

MP Brokers (124) — Pimentel 20, Ensi 14, Rollon 14, Enriquez 13, Abellana 10, B. Medalle 8, Elloren 8, Pangue 7, Amistoso 7, Villacastin 4, Largosa 4, N. Medalle 2.

Task Force (64) —Villarin 14, Mose 11, Regidor 8, Ybanez 6, Dejaresco 5, Rabuya 4, Viodor 4, Dela Cruz 4, Gacilos 2, Rojo 2. (Gabby G. Malagar)(BANAT NEWS)