Bisdak pakyas, NCR Grandslam

CEBU, Philippines - Wala molahutay ang Team Visayas  sa dalaygon nilang performance sa sinugdanan ug napuhalan sila sa defending champion National Capital Region nga misakmit sa ilang 3-peat title sa 6th Milo Little Olympics National Finals didto sa Marikina Sports Center.

Ang NCR miangkon sa perpetual trophy sa sporting meet nga gipasiugdahan sa Nestle Philippines sa ilang 647.5 points diin ilang nalabwan ang Bisdaks nga nahimutang sa ikaduha bitbit ang 563 puntos.

Ang Team Visayas nag-una sa elementary division sa ilang 298.5 points, apan naglisud ang ilang secondary level nga mihipos og 248 points.

Ang NCR nakakuha og dakung puntos gikan sa ilang secondary team nga adunay 249 points human midominar sa athletics, football, gymnastics, swimming, table tennis ug tennis.

Si Team Visayas delegation head Ricky Ballesteros mikalawat nga lisud gyud tangtangon ang NCR ilabi na nga naglisud sila sa mga team games sa secondary division.

Bisan pa niini, si Ballesteros nagmaya sa mga bag-ong record holders gikan sa Team Visayas nga mipakita sa ilang abilidad sa usa sa labing dakung national sporting meet sa nasud. Naglakip kini ni Michael Ichiro Kong sa swimming ug nilang Ninolito Justinieane, April Batoto ug John Rafols sa athletics.

Ang Don Bosco Technology Center (DBTC) nga mirepresentar sa elementary football team naghari usab sa upat ka sunod-sunod na nga tuig human nila gipilde ang NCR, 2-1 sa finals, samtang ang University of San Carlos (USC) nga maoy pambato sa secondary boys basketball midaog batok sa Luzon, 55-53 sa gold medal round.