7th Cebu Kiddies Championship banatan na karong adlawa
CEBU, Philippines - Himuon na karong adlawa ang 7th qualifying round sa Cebu Kiddies Championship nga gipasiugdahan sa School of Chess nga nahimutang sa ikaduhang andana sa Central Books Building sa dalan P. del Rosario, Cebu City.
Matud pa ni tournament director IM Kim Steven Yap, nga ang torneyo maoy katapusang duwa sa qualifying sa dili pa ang grand finals sa hinapos nga bahin ning tuiga.
Gawas sa mga ganting salapi, ang top two finishers sa 7-round Swiss system competition moabante sa finals nga gitakda sa Disyembre 27-29 sa mao gihapon nga binyu.
Ang overall champion mobulsa og P5,000 ingon man all-expense paid trip ngadto sa Dubai, United Arab Emirates alang sa 17th Dubai Open Chess Championship sa Abril sunod tuig.
Ang registration fee nagkantidad og P100 alang sa School of Chess members ug P150 sa non-members.
- Latest
