Nakabawos

CEBU, Philippines - Nakabawos ang University of San Carlos (USC) Warriors ngadto sa ilang CESAFI rivals Southwestern University (SWU) Cobras pinaagi sa pagpilde, 75-66 sa 10th Asian Universities Basketball Championship (AUBC)-Cebu Province International Collegiate Cup niadtong Huwebes sa gabii didto sa Dalaguete sa habagatang bahin sa Sugbo.

Daan nang naglungot-lungot ang Warriors nga mobawos dihang  miposte sila’g 21 puntos nga bentaha, 45-24 sa  nahabiling 2.6 segundos sa dili pa ang halftime dihang si coach Junthy Valenzuela  gipagawas sa duwa human matawgi’g duha ka sagunson nga technical fouls  tungod sa pagsige’g reklamo.

Si  Shooster Olago gitawgan og foul batok ni Anton Pardo sa SWU samtang nilusot, si Valenzuela daling misud tunga sa korte ug nakiglalis sa mga reperi nga miresulta sa iyang automatic technical. Nangayo pa si Valenzuela og laing technical foul  hinungdan nga gipagawas siya sa korte.

Human ma-thrown out si Valenzuela, kalit nga nausab ang dagan sa duwa sa Warriors ug  mikuyos sab dayon ang ilang 24 puntos nga labaw  ngadto na lang sa kuwatro puntos, 70-66 sa basket ni Daryl Goloran sa nahabiling 1:22 sa duwa.

Apan mitubag ang Warriors  ug nakontrolar nila ang ilang momentum. Ang crucial free throws ug ang three-point play ni Ian Tagapan maoy nakapatay sa Cobras.

Si Olago mikulit og game-high 20 puntos alang sa Warriors. Nagsalig sab sila sa outside shooting nilang Tagapan ug Nico Magat, kinsa miamot og 14 puntos matag usa dihang ang Warriors milansang sa ilang ikaduhang sunod-sunod nga daog. Sila si Bendley Valdor ug Landry Sanjo maoy nangu sa 1-1 nga Cobras sa ilang 13 ug 12 puntos.

Sa sayo pa, ang University of the Visayas (UV) Green Lancers miiskor og 88-68 nga kadaugan batok sa Myongji University  sa South Korea.

Si Rhaffy Octobre maoy nangu sa Lancers sa iyang 14 puntos. Sila si John Michael Abad  ug Alfred Codilla nagkumboya’g 25 puntos alang sa Lancers, kinsa nagtabla uban sa Cobras sa ilang 1-1 nga baraha.

Ang Myongji  University gipangulohan ni Jung Junsoo sa iyang 16  puntos samtang silang  Kim Hyusoon ug Kang Hoyeon midugang og 13 puntos  matag usa.