Korona sa Milo olympics bawion sa bisdaks

CEBU, Philippines - Naglungot-lungot na ang Team Visayas  pagbawi sa korona sa National Milo Little Olympics bisan pa’g anaa sila sa balwarte sa ilang karibal ug defending champion National Capital Region (NCR) didto sa Marikina Sports Center.

Ang Team Visayas maoy labing unang nakakuha og ‘grandslam’ title sukad nga gisugdan ang maong sporting meets sa Nestle Philippines niadtong tuig 2009.

Giputol sa NCR ang ilang pagdominar niadtong tuig 2012. Misuway pagbangon ang Team Visayas, apan gipilde gihapon sila sa NCR sa miaging tuig alang sa overall crown.

Ning higayona, ang NCR mao na usab ang nagtinguhang mokulit og ‘grandslam’, apan  ang ilang bulawanong plano babagan sa Team Visayas.

Si NCR regional organizer Dr. Robert Calo miingon nga wala ang mga UAAP ug NCAA players sa ilang koponan tungod sa  eskedyul sa Milo Finals, apan salig sila nga makuha nila ang grandslam.

Hinuon si Visayas organizer Ricky Ballesteros nagkanayon nga gawas sa NCR, hatagan usab nila og atensyon ang Mindanao athletes nga makahatag usab kanila og lisud nga duwa.

Matud pa ni Ballesteros nga usa sa rason  nganung wala nila makuha ang overall title sa miaging tuig mao ang kapildihan sa ilang elementary basketball team sa finals batok sa Mindanao.

Ang opening sa National Finals sugdan karong alas-5 sa hapon didto sa Marikina Sports Center, apan ang mga duwa sa Sabado pa ipahigayon.

Kapil sa 10,000 ka mga atleta, coaches ug delegation officials ang gipaabot nga mutambong sa opening ceremony.

Mga sporting discipline nga tigian naglakip sa athletics, badminton, basketball,  chess, football, gymnastics, scrabble, sepak takraw, swimming, taekwondo, tennis, table tennis ug volleyball. (BANAT PALARO)