Ocier Bayani sa AC Troopers sa LABA cagefest
CEBU, Philippines – Giluwas ni Ariel Ocier ang defending champion AC Troopers pinaagi sa iyang buzzer-beating shot, 86-84 batok sa Huskies sa kulbahinam nilang duwa sa Los Amigos Basketball Association (LABA) Commissioner’s Cup 2014 cagefest niadtong Lunes sa gabii diha sa Banilad Sports Complex, Mandaue City.
Mahatod unta ang duwa ngadto sa overtime kay mikagar ang tira ni SPO4 Dondon Coloscos, apan si Ocier daling nakahimo’g follow-up basket dungan sa pagtingog sa final buzzer nga nakapahugno sa AC Troopers.
Si Aldrin Gonzaga miiskor og 14 puntos aron maoy mangu sa AC Troopers nga nagbitbit na og 3-2 nga baraha. Si Joel Cabahug mitimang og 11 puntos, samtang sila si Ocier ug Coloscos parehong mitikdol og sayes puntos alang sa AC Troopers nga kanunay’ng gibiyaan sa unang duha ka kuwarter. Diha na nakalabaw ang AC Troopers dayong tapos sa first half, 39-38 human sa basket ni Joel Cabahug.
Nahimong kulbahinam ang duwa dihang nagtabla ang iskor, 53-all ug nagsinukliay og mga puntos ang duha ka kampo, apan sa kaulahian, ang AC Troopers maoy nagmadaugon.
Ang Huskies ni teamowner Dr. Raul Monteroyo gipangulohan gihapon ni Richard Madrid, kinsa mipabuto’g 22 puntos, diin 13 niini iyang nahimo sa first period. Si Richard Bathan mitampo’g 18 puntos ug si Eboy Quiñahan miabuno’g 14 puntos alang sa Huskies nga nakatilaw sa ilang ikaduhang sunod-sunod nga pilde.
Sa laing aksiyon, ang Allied padayong mikutlo’g daog pinaagi sa paglubong sa LABA Lancers, 126-91.
Unom ka players sa Allied ni Cris Martenito ang miiskor og double figures sa pagpangulo ni Rowen Grafe, kinsa mikadlit og 30 puntos. Ang undermanned nga LABA Lancers ni Christopher Ubas gipangulohan sab ni Dodoy Rizane pinaagi sa iyang 23 puntos. Si Banilad barangay councilor Gilbert Sebandal mikabya og 13 puntos, samtang ang LABA president nga si Cris Ubas miabuno’g 11 puntos.
Si Cesar Lee, usa sa mga founder sa LABA, ang personal nga misaksi sa maong duwa nga gidumala ni LABA vice president for external Gilbert Sebandal. (BANAT NEWS)
- Latest
