Pacquiao, Kia daog sa PBA debut
CEBU, Philippines – Nakatilaw og daog sa labing una nilang duwa sa PBA ang Kia Sorento ni Filipino boxing icon ug playing coach Manny Pacquiao human nila gilubong ang Blackwater Elite, 80-66, sa opening game sa PBA Philippine Cup kagahapon didto sa Philippine Arena.
Ang Kia gibiyaan sa first half, 25-34, apan mihimo sila og dakung scoring rally sa third period sa pagpangulo sa point guard nga si LA Revilla kinsa miiskor og 14 puntos sa maong kuwarter.
Si Revilla maoy nangulo sa Kia sa iyang 23 puntos ug pito ka rebounds, samtang sila si Reil Cervantes ug Hans Thiele mipuntos og 13 matag usa.
Si Pacquiao wala makahimo og puntos tungod kay miduwa lang siya og pipila ka minuto sa first period sa wala pa hingpit nga milingkod sa bench.
Dili hinuon kapugngan nga makwestiyon ang tinuoray nga abilidad ni Pacquiao kun aduna ba gyud kini ikabuga sa professional basketball.
Ang libuan ka mga fans nga mitan-aw miabiba pa nga ibalik sa Kia si Pacquiao sa playing court, apan wala na miduwa pa ang Pinoy boxing superstar.
“Masaya na ako, panalo kami,” mubo nga tubag ni Pacquiao sa The Philippine STAR.
Ang 6-foot-8 nga si JP Erram miiskor og 10 puntos alang sa Blackwater nga sama sa Kia usa usab ka bag-ong koponan sa PBA. (BANAT NEWS)
- Latest
