MS Motosuit, AC troopers nakarekober

CEBU, Philippines – Nakabangon ang MS Motosuit gikan sa 24 puntos nga pagkalubong sa second quarter aron moiskor sa ilang ikaduhang daog sa Los Amigos Basketball Association (LABA) Commissioner’s Cup 2014 basketball tournament sa miaging gabii diha sa Banilad Sports Complex sa barangay Banilad, Mandaue City.

Ang MS Motosuit ni playing coach ug team owner Lou Ornopia milabang una og pito ka lawod sa wala pa nila maangkon ang kadaugan batok sa Falcon, 92-88. Imbes maluya sa lawom kaayong lubong, ang MS Motosuit nadasig hinuon sa pakigbisog ug wala kini mohunong sa paglabyog hangtod nga nailog nila ang 71-66 nga bentaha sa third period human sa basket ni Ornopia.

Gikan sa 73-72 sa sayong bahin sa fourth period, ang MS Motosuit kalit lang nga miratsada  aron moabante og 70-73 nga abante pinaagi sa 3-point play ni Merot Ygonia. Si Ygonia maoy nangu sa MS Motosuit nga mikamada’g 29 puntos.

Midaku ang kahigayonan sa MS Motosuit nga modaog human ma-fouled out silang Efren Yatan ug Marcial Marturillas sa fourth quarter.

Si Ornopia nakatabang sab og daku sa kadaugan sa iyang koponan nga miabuno’g 12 puntos, samtang si Albert Ramos mitampo’g 10 puntos.

Upat ka players sa 1-2 nga Falcon ang miiskor og double sa pagpangulo ni Richard Jordan, kinsa mipabuhagay og 15 puntos. Si Glen Rostata miantog og 13 puntos, gisundan nilang Dodoy Dawal ug Marturillas nga parehong mitimbre’g 12 puntos.

Sa laing aksiyon, nakatilaw na gyud og daog  sud sa tulo ka duwa ang AC Troopers ni SPO4 Dondon Coloscos dihang ilang giposasan ang LABA Lancers, 79-74. Gipangulohan kini ni Ariel Ocier, kinsa mipabuto’g 14 puntos. Si Al Yamomo mao sab ang bugtong player nga miiskor og double digits alang sa LABA Lancers sa iyang 16 puntos. Si Banilad barangay councilor Gilbert Sebandal, kinsa moiskor og double figures matag duwa gilimitahan lang og dos puntos.

Si LABA president igo lang sab miiskor og siyete puntos alang sa Lancers nga nagbitbit karon og 1-3 nga baraha niining maong liga nga gipaluyohan sa Banilad Barangay Council ubos sa liderato ni Brgy. Capt. Greg Yap.

Ang mga duwa gidumala ni LABA vice president for external Gilbert Sebandal sa abag nilang Rey Mart Sandag, Glenn Oppus ug Allan Recla, ingon man nilang Louie Canen ug Nestor Sollano sa VIMBRA. (BANAT NEWS)