1st Monterrazas mountainbike race mosikad na
CEBU, Philippines - Mosikad na ang 1st Monterrazas de Cebu Road and Mountainbike Challenge karong adlawa nga magsugod ug matapos sa Residences at the Peaks sa barangay Guadalupe ning siyudad.
Adunay 262 ka entrante lukop nasud ang magtakus alang sa dakung dungog.
Ubang mga sakop sa Philippine team nga pangulohan sa garbo sa Sugbo nga si John Renee Mier ang mopakita sa ilang katakus nga giisip nga labing daku nga event sa kasaysayan sa Cebu cycling.
Matud pa ni race director Joe Deresas sa Unified Cycling of Central Philippines-Cebu Chapter nga gawas ni Mier, ang lain pang mga top contenders sa open elite division naglakip nilang Oscar Rendole, Dominador Marana, Rustom Lim ug Ronald Lomotos.
Moapil sab ang pipila ka mga riders gikan sa Manila, Bohol, Ormoc, Butuan, Tanjay, Cadiz, Dumaguete ug uban pang mga dapit sa Visayas ug Mindanao.
Ang Sugbuanon nga si Niño Surban dili makasalmot kay moapil siya og duha ka mga dagkung internasyonal nga kompetisyon sa Langkawi, Malaysia nga magsugod sab karong adlawa.
Ang duha ka adlaw nga kompetisyon sa Monterrazas gipasiugdahan sa Genvi Development Corporation subhan 4.5 kilometer mountainbike sayo ning buntaga.
Ugma ang 5.2 kilometer road bike challenge.
Gawas sa open elite, ang lain pang mga kategoriya nga tigian mao ang seniors (50-above), juniors, executive (PRC license holders), fat riders, golden riders (60-above), women’s ug beginners.
Ang overall champion sa open elite division makadawat og P10,000 pay check. Ang ikaduha hangtod sa ikalima makadawat og P8,000, P6,000, P4,000 ug P2,000 matag usa.
Gawas sa ganting salapi, ang top five finishers matag kategoriya makadawat sab og tropeyo ug medalya.
- Latest
