UV mobawos
CEBU, Philippines - Suwayan sa Sacred Heart School-Ateneo de Cebu (SHS-AdC) Magis Eagles mokulit og laing kasaysayan sa ilang pakigsangka sa University of the Visayas (UV) Baby Lancers sa Game-2 sa ilang “best-of-three” juniors division finals sa 14th Cebu Schools Athletic Foundation Inc. (CESAFI) basketball tournament karong adlawa didto sa Cebu Coliseum.
Gawas lang kun aduna pay laing alas ang Baby Lancers, mapugngan pa ang Magis Eagles sa pagsaulog sa ilang ikaduhang titulo sa CESAFI.
Human midaog sa opener, 56-51 niadtong Martes, ang Magies Eagles kinahanglan na lang og usa ka daog alang sa una nilang back-to-back championship sa maong liga.
Bitbit ang 3-0 nga bentaha batok sa Baby Lancers niini nga season, ang Magis Eagles dili kahibudngan nga maoy inilog nga modaog sa ilang duwa karon nga sugdan sa alas-5:30 sa hapon.
Apan bisan pa og mas paborito sila, ang Magis Eagles kinahanglan gihapon nga mabinantayon batok sa Baby Lancers, kinsa naglungot-lungot nga mobawos.
Sa gihapon ang Magis Eagles magsalig nilang Janjan Jaboneta, Joshua Sinclair, Zachary Lance Eden Huang ug Jose Piero Dominic Longa nga kanunay lakip sa ilang rotation sa bigmen. Naglaum sab sila sa suporta gikan nilang Joseph Mayol, Steven Co, Jeremy Nacua, Renzo Calumpang, Travis Jelour Mantua ug Nino Araw-araw.
Sa habig sa Baby Lancers, magsalig sab kini nilang Orlan Wamar ug John Carl Escalona, apan nagkinahanglan sab sila sa suporta nilang Theo Joshua Flores, Samnuel Schaub ug Raul Jancork Cabahug kun gusto pa nilang malugwayan ang series. (BANAT NEWS)
- Latest
