UV batok SHS-ADC sa Cesafi finals

CEBU, Philippines -  Gihimadlan nang daan nga ang Sacred Heart School-Ateneo de Cebu (SHS-AdC) Magis Eagles ug ang University of the Visayas (UV) Baby Lancers maoy mag-abot sa “best-of-three” finals titular showdown sa juniors division  human sila modaog batok sa tagsa-tagsa nilang karibal  sa 14th Cebu Schools Athletic Foundation, Inc. (CESAFI)  kagahapon didto sa Cebu Coliseum.

Miabante sa finals ang Magis Eagles human midagit og  59-52 nga kadaugan batok sa University of Southern Philippines Foundation (USPF) Baby Panthers, samtang ang Baby Lancers miabante sab sa finals  pinaagi sa paglubong buhi  sa Cebu Institute of Technology-University  (CIT-U) Wildkittens, 80-43.

Tungod kay pulos na non-bearing ang duha ka duwa nga gikatakda unta karong adlawa, gikanselar kini sa mga organizers pinangulohan ni CESAFI commissioner Felix O. Tiukinhoy Jr.

Ang Game-1 himuon karong Martes, samtang mag-ilog sa third place sa usa ka knockout match ang Baby Panthers ug ang Wildkittens.

Wala kapugngi ang pagmangtas nilang Theo Joshua Flores ug Orlan Wamar, kinsa maoy nangu sa opensa sa Baby Lancers sa ilang 24 ug 22 puntos matag usa.

Bugtong si Adryan Padilla maoy wala makaiskor sa tanang players nga gipasulod sa Baby Lancers.

Tulo ka players sa  Wildkittens ang mihimo’g double figures nga silang Jeroel Pedrosa ug Joshua Manatad nga parehong miposa’g 11 puntos,  samtang  si Justin Jules Langres mikabkab og 10 puntos.

Sa sayo pa, si Joshua Sinclair maoy nangu sa Magis Eagles sa iyang 13 puntos, gisundan nilangJoseph Mayol ug Janjan Jaboneta nga adunay 10 puntos matag usa.

Ang Baby Panthers gipangulohan sab ni  Ain Obenza human siya moburak og 24 puntos samtang si John Brylle Bahio miabuno’g 15 puntos. (BANAT NEWS)