Andam na tanan alang sa Calambua moto-X
CEBU, Philippines - Magpunsisok na sab ang mga residente sa Calambua sa San Remigio, Cebu karong Domingo dihang ipahigayon ang fifth leg sa 2014 MS Motosuit Motocross Series nga uloha’g “Calambua Motocross Challenge.”
Modugang og kinabuhi sa maong kalihukan mao ang paglusad sa Yamaha Motor Philippines Inc. sa ilang duha ka top-grade motorbikes -- ang XTZ 125 ug Serow 250 atol sa maong lumba.
Gawas pa niana, ang Yamaha mopahulam sab og 12 ka units ning maong motorbikes alang sa mga riders sa off-road world category, nga gilauman mokawat og atensiyon sa charity motocross.
“I’m very happy and honored that of all the places, Yamaha chooses to launch their new motorbikes in Calambua,” matud pa ni MS Motosuit big boss Lou Ornopia sa The Freeman, ang igsuong mantalaan sa Banat News.
Kapin sa 100 ka riders sa tibuok nasud ang gitakdang mosalmot ning usa ka adlaw nga kompetisyon.
Lakip sa mga bantugang riders nga tutokan mao si Jonjon Adlawan, ang nag-unang kandidato alang sa “Rider of the Year” award, Jubenile Abellar ug Dondon Yuson sa pro open category.
Lain pang mopakita’g aksiyon ning kulbahinam nga matang sa paugnat sa kusog mao silang Scot Remy sa Dumaguete, Windsor Famorca sa Guimaras, crowd-darling sa Cebu nga si John Flores, Cyril Tariman, JC Obligado, Dongkey Sanchez ug ang mga bata apan masaarong riders nga pangulohan ni BJ Pepito ug Charisse Connock Olanda.
Mosalmot sab ang mga riders sa Sel-J Racing Team sa Manila ug sa laing dapit sa Visayas ug Mindanao.
Gawas sa world off-road ug pro open, ang uban pang mga kategoriya nga tigian mao ang mini 60cc ug 85cc, beginners, local enduro, open enduro, executive A, B ug C, intermediate ug expert.
Sa laing bahin, ang Yamaha moadto karon sa Calambua National High School alang sa official turn over ceremonies sa mga classrooms sa tunghaan. Mohatag sab sila og educational supplies ngadto sa mga tinun-an. (BANAT PALARO)
- Latest
