Wildkittens nakabihag

CEBU, Philippines – Gipakuratan sa Cebu Institute of Technology-University  (CIT-U) Wildkittens  ang topseed Sacred Heart School-Ateneo de Cebu (SHS-AdC) Magis Eagles, 60-57  sa pagsugod sa second round semifinals sa juniors division sa 14th Cebu  Schools Athletic Foundation, Inc. (CESAFI)  kagahapon didto sa Cebu Coliseum.

Ning pagsuwat, padayon pa ang sangka tali sa University of San Jose- Recoletos  (USJ-R) Jaguars batok sa University of the Visayas (UV) Green Lancers  alang sa ikatulong puwesto sa seniors division.

Masakit man alang sa Magis Eagles ang maong sikit nga pilde, apan wala kini makaapekto sa ilang kampanya tungod kay sila lang gihapon maoy numero uno. Ang deperensiya kay naputol ang ilang 11-0 winning streak.

Halos dili mosipyat sa ilang mga tirada ang  Wildkittens hinungdan nga nakahimo sila paglabaw og 25 puntos, 50-25 pagsugod sa fourth period.

Nakan-an  ang  labaw sa Wildkittens dihang mipatuman og  full-court trap defense ang Magis Eagles.

Ang basket ni Zach Lance Eden Huang maoy nagpasikit sa Magis Eagles ngadto sa 57-58 nga biya sa katapusang otso segundos.

Ang duha ka free throw ni Henry Acop sa nahabiling 6.4 segundos maoy nagselyado sa kadaugan sa Wildkittens.

Sayong nanginit ang Wildkittens kinsa nagsugod sa 14-3 sa sayong bahin sa first period ug milabaw og 14 puntos  sa halftime, 28-14.         Miburot pa gyud ang ilang labaw ngadto sa 23 puntos human sa third period, apan hinay-hinay nga mikuyos ang ilang labaw sa nanghinapos nga gutlo sa fourth period.

Ang sinaligan sa Wildkittens si Justin Jules Langres nakaangkon og piang sa walang kamot human siya malamba sa sawog sa uwahing bahin sa third quarter ug wala na makabalik og duwa. Bisan pa niini, siya gihapon ang topscorer sa Wildkittens pinaagi sa iyang 15 puntos. Si Joshua Manatad miamot og 12 puntos alang sa Baby Wildcats.

Si Huang mao usab ang nangu sa Magis Eagles sa iyang 16 puntos, gisundan ni  Joshua Sinclair nga adunay 10 puntos. (BANAT NEWS)