Back-to-back wins asam ng Stags
MANILA, Philippines – Magpapataas ng kumpiyansa ang San Sebastian Stags sa puntiryang panalo sa Emilio Aguinaldo College Generals sa 90th NCAA men’s basketball ngayon sa The Arena sa San Juan City.
Ang laro ay magsisimula sa ganap na alas-5 ng hapon at nag-iisang seniors game dahil hindi na lalaruin ang dapat ay unang labanan sa pagitan ng Mapua Cardinals at Letran Knights.
Nakatakda ito sa ganap na alas-11 ng umaga pero hindi makakabuo ng limang manlalaro ang Cardinals para i-forfeit ang laro.
Apat na manlalaro lamang ang nasa Cardinals matapos patawan ng suspension ang walong players na sumuong sa free-for-all sa laro kontra sa Generals.
Nakabalik na sa EAC mula sa one-game suspension si Faustine Pascual para makasama sina Jozhua General, Jerald Serrano, Christ Mejos at Ai Indin para matuloy ng Generals ang laban.
Kailangan lamang na walang ma-foul out sa Generals para hindi kaagad na matapos ang laro.
Galing ang Stags sa 82-66 panalo laban sa Lyceum Pirates upang wakasan ang 10-game losing streak.
Asahan na magseseryoso ang San Sebastian para makuha ang panalo na magagamit para mapataas ang morale sa pagbangga sa mga Final Four contenders na Perpetual Help Altas at host Jose Rizal University Heavy Bombers sa kanilang huling dalawang laro.
- Latest
