Magis Eagles, 2-0 na

CEBU, Philippines - Nainat sa Sacred Heart School-Ateneo de Cebu (SHS-AdC) Magis Eagles ang ilang daog ngadto sa 10 ka sunod-sunod nga higayon human nila gilubong ang University of Southern Philippines Foundation (USPF)  Baby Panthers, 66-52 kagahapon sa juniors division semifinal round sa 14th Cebu Schools Athletic Foundation, Inc. (CESAFI) didto sa Cebu Coliseum.

Nagmangtas ang Magis Eagles didto sa fourth period diin didto na moepekto ang ilang hugot nga depensa aron biyaan og 20 puntos ang Baby Panthers, 62-42 human sa basket ni Janjan Jaboneta  sa nahabiling  2:40  sa duwa. Niadtong  tungora, misurender na  ang Baby Panthers pinaagi sa pagpasulod sa ilang mga bench players ug second stringers.

Sikit pa unta ang duwa sa uwahing bahin sa third period diin igo lang nabiyaan og tres puntos ang Baby Panthers, 30-33 human sa basket ni Carl Carbajosa, apan dihang mibawos og three-pointer si Travis Jelour Mantua  kalit lang midistansiya ang Magis Eagles.

Ang Baby Panthers nagpakita’g kaagresibo sa first period diin nakahimo sila paglabaw, 14-11. Milabaw sila’g usab sa iskor 17-15 sa uwahing bahin sa second quarter, apan gitapos sa Magis Eagles ang maong period pinaagi sa ilang 12-5 scoring run.

Low scoring pa unta gihapon ang third period dihang nakabentaha og diyutay ang Magis Eagles sa ilang 23-19 scoring run sa third quarter.

Si Joshua Sinclar maoy nangu sa 2-0 Magis Eagles sa iyang 18 puntos, samtang  silang Jaboneta ug Mantua parehong adunay 10 puntos. Ang 0-2 nga Baby Panthers gipangulohan ni Ain Obenza sa iyang 19 puntos.

Ning pagsuwat, padayon pang nagsangka ang no. 2  seed University of the Visayas (UV) Baby Lancers batok sa no. 4  Cebu Institute of Technology-University (CIT-U) Wildkittens.

Puntos matag usa

SHS-AdC (66) –  Sinclair 18, Mantua 10, Jaboneta 10, Huang 9, Araw-Araw 6, Mayol 5, Co 4, Longa 2.

USPF (52) –  Obenza 19, Carbajosa 13, Bahio 6, Alocillo 4, Avancena 4, Archival  3, De Dios 2, Fermin 1. (BANAT PALARO)