Echavez, Ting nanghawod sa Hunat Sugbo Triathlon-Argao
CEBU, Philippines – Ang multi-titled triathlete nga si Lorhiz Echavez Lopez ug Board of Director sa Cebu Parklane International Hotel nga si Allan Ting maoy nidominar sa tagsa-tagsa nila ka dibisyon sa Argao edition sa Hunat Sugbu Triathlon niadtong Domingo.
Si Echavez-Lopez, kinsa mao sab ang hara sa unang edisyon sa lumba didto sa Oslob sa miaging tuig midaog sa women’s open dihang gitapos niya ang lumba sud sa duha ka oras, 45 minutos ug 30 segundos.
Si Cianyl Gonzales (2:52:59) sa Team Parklane mipahiluna sa ikaduhang dapit, samtang si Meg Stevens ang miangkon sa ikatulo sa oras nga 3:11:37.
Ang mga partisipante misubay sa 1.5-kilometer swim, 40km bike ug 10km run.
Sa iyang bahin, si Ting (2:30:59) mipakita sa iyang grabeng determinasyon aron makuha ang men’s open title. Iyang gipilde ang veteran triathlete nga si Emmanuel Commendador (2:31:11). Ang teammate ni Ting nga si Kristianne Lim (2:33:51) maoy mikompleto sa top three.
Laing duha ka pambato sa Parklane nga silang Johnny Ferniz ug Jebb Cane mihatag sab og dungog sa koponan. Si Ferniz mipuwesto sa ikaduhang dapit sa 25-29 class, samtang si Cane ikatulo sa 19-24 class.
Sa sprint race, si Ralph Eduard So maoy naghari sa men’s class, samtang si Issa Priagula maoy mananaog sa women’s side. (BANAT NEWS)
- Latest
