Red Lions pasok sa final four
Laro Bukas
(The Arena, San Juan City)
12 n.n. Letran vs St. Benilde (jrs/srs)
4 p.m. Jose Rizal U vs San Sebastian (srs/jrs)
MANILA, Philippines - Hindi man kasing-ganda ang ipinakita sa huling laro ay hindi naman nadiskaril ang target ng four-time defending champions na San Beda College na makapasok sa Final Four nang lapain ang Lyceum, 76-60, sa 90th NCAA men’s basketball tournament kahapon sa The Arena sa San Juan City.
Nanatili rin sa ikalawang puwesto ang Arellano University nang tuhugin ang Emilio Aguinaldo College, 105-88, sa ikalawang laro.
Si Prince Caperal ay may 18 puntos at dalawa lamang sa 11 buslo ang kanyang naisablay para pamunuan ang matinding pag-atake ng Chiefs na umakyat sa 11-4 baraha.
Sa second half naman humataw ang Red Lions para iwanan ang Pirates tungo sa paghagip ng ika-13 panalo sa 15 laban at marating ang semifinals sa ika-siyam na sunod na taon.
Nagtulong sina Arthur dela Cruz, Anthony Semerad at Baser Amer sa ikatlong yugto upang ang pitong puntos na kalamangan sa halftime ay lumobo sa 15 puntos, 57-42, matapos ang ikatlong yugto.
Si Dela Cruz ay may 18 points, 7 rebounds at 4 assists, si Semerad ay may 13 markers kasunod ang 9 ni Amer.
Ang pambatong sentro na si Nigerian import Ola Adeogun ay nagkaroon lamang ng siyam na puntos dahil napikon siya sa pisikal na laro ng Pirates.
Magkasunod na flagrant at technical fouls ang itinawag sa 6-foot-7 center matapos sikuhin si Rhoel Maconocido na naputukan dahil sa pangyayari.
“Hindi ganito ang ipinakita namin laban sa Letran at sinuwerte lang kami dahil masama ang laro ng Lyceum,” wika ni Fernandez.
Ngayong nakaapak na sa Final Four, pagtatangkaan ng Red Lions ang ‘twice-to-beat’ advantage.
Si Joseph Gabayni ay may 22 puntos ngunit siya lamang ang nag-iisang manlalaro ng Pirates na nasa doble-pigura na naglagay sa balag ng alanganin ang paghahabol ng puwesto sa susunod na round sa kanilang taglay na 6-9 baraha. (ATan)
SBC 76 – Dela Cruz 18, A. Semerad 13, Amer 9, Adeogun 9, Mendoza 8, Pascual 7, Tongco 5, Koga 4, Sara 2, D. Semerad 1, Mocon 0.
LPU 60 – Gabayni 22, Baltazar 8, Taladua 7, Malabanan 5, Mbida 5, Elmejrab 3, Bulawan 2, Maconocido 2, Pamulaklakin 0, Soliman 0, Lesmoras 0.
Quarterscores: 19-14; 35-28; 57-42; 76-60.
Arellano 105 - Caperal 18, Enriquez 12, Nicholls 11, Holts 11, Agovida 10, Hernandez 8, Jalalon 7, Ciriacruz 6, Palma 6, Pinto 0, Gumaru 4, Bangga 4, Cadavis 2, Ortega 0.
EAC 88 - Tayongtong 25, Serrano 15, Jamon 12, General 9, Onwubere 8, Saludo 7, Mejos 6, Quilanita 4, Pascual 2, Santos 0, Arquero 0.
Quarterscores: 24-13; 55-34; 85-57; 105-88.
- Latest
