Anthony kabilang sa 5-player, 3 team trade

MANILA, Philippines - Kung sakali ay maglalaro si small forward Sean Anthony sa kanyang pang-apat na koponan sa Philippine Basketball Association.

Kabilang ang 6-foot-4 na si Anthony sa isang five-player, three-team trade sangkot ang Meralco at mga baguhang NLEX at Blackwater Sports .

Hinihintay pa ang pag-apruba ni PBA Commissioner Chito Salud bago maselyuhan ang naturang kasunduan.

Sa nasabing trade, dadalhin ng Road Warriors, bumili sa prangkisa ng Air21 Express, sina Anthony at guard Simon Atkins sa Elite kapalit si Perpetual Help guard Juneric Baloria at ang second round picks ng Blackwater Sports para sa 2016 at 2017 PBA Rookie Draft.

Ibibigay naman ng Elite sina Anthony at Atkins sa Bolts kapalit nina veteran shooter Sunday Salvacion at 6’8 Jason Ballesteros.

Ang 28-anyos na si Anthony ang No. 6 overall pick ng Air21 noong 2010 at kaagad ibinigay sa Powerade sa gabi ng nasabing PBA Draft.

Mula sa Tigers ay naglaro si Anthony sa Barako Bull Energy, Talk ‘N Text Tropang Texters at Express.