Turkey, Brazil pasok sa quarterfinals ng World Cup

BARCELONA, Spain – Isinalpak ni Turkey forward Emir Preldzic ang kanyang ikalawang last-minute three-pointers sa huling limang segundo para talunin ang Australia, 65-64, papasok sa quarterfinals ng Basketball World Cup.

Lalabanan ng Turkey sa quarterfinals ang Lithuania, nakakuha ng 22 points kay Jonas Valanciunas para talunin ang New Zealand, 76-71.

Sa Madrid, tumipa si Neto ng 21 points para pangunahan ang Brazil sa 85-65 paggiba sa Argentina patungo sa quarterfinals.

Sasagupain ng Brazil sa quarterfinals ang Serbia, nakahugot kay guard Bogdan Bogdanovic ng apat na 3-pointers at tumapos na may 21 points sa 90-72 pagsibak sa Greece.

Lamang ang Australia ng limang puntos sa huling minuto ng fourth quarter nang tumipa ng tres si Preldzic para idikit ang Turkey sa 62-64 agwat.

Natawagan ang Australia ng shot clock violation na nagresulta sa tres ni Preldzic na siyang nagpanalo sa Turkey.

Nagtala sina Preldzic at guard Sinan Guler ng tig-16 points para sa tagumpay ng mga Turks.

Umiskor naman si San Antonio Spurs forward Aron Baynes ng 15 markers sa panig ng Australia, lumamang ng 12 points sa third period.