Petracorta-Rollway ug Ynah Brokers daog

CEBU, Philippines – Nakabihag dayon ang Petracorta-Rollway Brokers ug ang Ynah Brokers kaniadtong Huwebes human ilang gipukan ang tagsa-tagsaa nila ka karibal sa nagpadayon nga 3rd season sa BOC-CIPU didto sa baranggay Tinago gym, ning dakbayan.

Daw sa nakabuhi sa toril ang Petracorta-Rollway sa third period diin kalit nilang gibiyaan ang MP Brokers ni team owner Marty Pimentel aron mokulit og 79-68 nga kadaogan samtang gilubong sa Ynah Brokers batok sa Avenido Brokers sa iskor,  93-67.

Wala damha nga ang sikit nga first period nga nahimong 34-26 atol sa halftime pabor sa Petracorta-Rollway, kalit lang miburot ngadto sa 23 puntos nga labaw, 53-30 sa naghinapos nga bahin sa third period human sa three-point play ni Takloy Moral.

Nakasikit ang MP Brokers didto sa fourth quarter dihang migamit sila og trapping defense apan kutob lang sa siete puntos ang labing duol nilang rally, 68-75 sa nahibiling pipila ka segundos ang nahibilin sa duwa.

Wala kapugngi si Julius Tarona kinsa maoy nangu sa  Petracorta ni coach Larry Villanil ug dako sab og natabang silang Moral ug Francis Palero.

Sa laing duwa, mihakot og 24 puntos ang power forward nga si Gerry Singson  aron pangulohan ang Ynah Brokers. (BANAT NEWS)