Sunsport Basketball Camp sa Cordova plansado na
CEBU, Philippines - Nahikay na ang tanan alang sa Sunsport Basketball Training Camp didto sa Cordova nga sugdan karong Sabado didto sa Cordova Sports Complex.
Ang lima ka semanang training camp gitakdang matapos sa Oktubre 4.
Himuon kini matag adlaw’ng Sabado gikan sa alas-8 hangtod sa alas-10 sa buntag.
Bukas kini sa tanang aspiring hoopster nga nagpangedaron gikan sa otso hangtod sa 19 anyos.
Matud pa ni training camp director Giovannie ‘Jojo’ Romarate, nga kasagaran nilang ipahigayon ang tinuig nga kalihukan atol sa summer, apan tungod sa hangyo sa kadaghanan, nakahukom sila sa pagpahigayon og weekly camps.
Sumala pa ni Romarate, nga atol sa training, ang mga partisipante mokat-on og fundamental ug technical aspects sa sports.
“We will impart to our students the fundamentals of the sport such as proper shooting, dribbling, passing, footwork and other related drills,” matud pa ni Romarate, kinsa mao sab ang head coach sa Salazar Colleges of Science and Institute of Technology (SCSIT) Skyblazers. Ang registration fee sa training camp nagkantidad lang og P1,000, libre na niini ang upper jersey ug Sunsport basketball 2014 edition.
Alang sa dugang mga pakisayod, mahimong mokontak ni Romarate sa 0933-2677713/0921-2338305 or 260-8608. (BANAT NEWS)
- Latest
