Bernaldez mikulata ni Bongcawil sa ALA-Cobra fight card
CEBU, Philippines- Usa ka bangis nga fourth round knockout nga kadaugan ang gipahamtang ni undefeated ALA Boxing Gym mainstay Mark ‘Machete’ Bernaldez ngadto ni Ryan ‘Street Fighter’ Bongcawil sa main event sa ALA Promotions-Cobra Energy Drink ‘Tunay na Lakas Boxing’ niadtong miaging gabii didto sa Lapasan covered court sa Cagayan de Oro City.
Ang 22-anyos nga si Bernaldez hinay-hinay nga mipaigo sa iyang mga limpyong kombinasyon ngadto sa ulo ug lawas sa taga-Malaybalay City boxer.
Apan pag-abot sa fourth period, gibombahan ni Bernaldez si Bongcawil dihang milusad siya og bangis nga atake nga gitapos sa usa ka one-two combo nga maoy hingpit nga mitapos sa iyang kontra.
Sa maong kadaugan, si Bernaldez mipalambo sa iyang record ngadto sa 14-0, 10KOs, samtang si Bongcawil nakahiagum sa iyang ika-11 nga pilde sa 18 ka duwa.
Sa supporting main event, laing ALA Gym boxer nga si Elmo ‘Bisdak’ Traya (5-,1, 4KOs) sayun nga midispatsar ni Jesar Ancajas (15-25, 7KOs) sa first round.
Sa laing resulta, si Jonas Sultan mipaundang ni Renante Suasca sa opening round, Jess Whaminal midaog batok ni Paolo Perono via third round TKO, Andrew Debucas mipilde ni Prince Canonero pinaagi sa unanimous decision, samtang ang sangka nila ni Brian Lobitania ug Rowell Garcia miresulta sa technical draw. (BANAT NEWS)
- Latest
