Binakbakay sa coliseum
MANILA, Philippines - Kulbahinam nga Mixed Martial Artials action ang masaksihan sa mga Cebuano fight fans sa dihang ang unang edisyon sa Cebu Extreme Fight League nga ulohan og “The Beginning” mosikad karong gabii diha sa Cebu Coliseum.
Ang garbo sa Sugbu nga si Lando ‘Alamid’ Nacua sa Yaw-Yan ArDigma Cebu makigharong ni Paul ‘The French’ Carrere sa Unified MMA sa usa ka three-round amateur superfight main event ubos sa bantamweight division.
“Wala nay atrasay, mao na gyud ni ang oras nga ako gipangandaman,” matud pa sa 24-anyos nga si Nacua.
“Saturday night (karong gabii) will be a war between this two,” matud pa ni Yaw-Yan ArDigma CEO ug tournament director Master Benigno ‘Ekin’ R. Caniga Jr. atol sa official weigh-in kagahapon didto sa Yaw-Yan ArDigma headquarters.
Sila si Nacua ug Carrere pulos nakakuha sa weight limit nga 135 lbs.
Sa supporting main event, ang grappler nga si Roy ‘Agilon’ Bajar sa Yaw-Yan ArDigma mosukod sa abilidad ni knockout artist Nino Rio ‘Tatus’ Saoy sa Tatus Muay Thai and MMA.
Sa duha ka paresan sa special attraction, si Angel 'Lawin' Sanchez sa Yaw-Yan ArDigma ug usa ka registered nurse motikang sa delikadong kalibotan sa MMA batok ni Bridgette ‘Rising Warrior’ Torbiso sa Durex Kickboxing Club sa women’s category.
Masaksihan usab ang pinaksitay sa mga gagmay’ng bata diin si Ken ‘Cimaron’ Caniga makigsangka ni Benedict ‘Little’ Torbiso ubos sa kids division.
Mokompleto sa fight card mao sila si Erving ‘Immortal’ Mosico vs. Jhonjier ‘Excalibor’ Torbiso, John ‘Little’ Dulap sa Project X vs. Ronilee ‘Black Bull’ Castro sa Tatus MMA, Earl ‘Texas’ Surigao sa Yaw-Yan ArDigma vs. Bryan ‘Heat’ Otida sa Arcomjukai KBC, David 'Venum' Po sa SOMA KBC vs Roel 'Tigbas' Arcipe sa Warriors MMA; Junrey ‘Botong’ Soquite sa Durex KBC vs. Rodel ‘Pitbull’ Valisado sa Unified MMA ug Bryan ‘Spiker’ Nuñez sa Yaw-Yan Mustang vs. Rodil ‘Ghost’ Lamoste sa Arcomjukai KBC.
Ang mga tiket nagkantidad og P300 sa VIP, P200 sa ringside, P150 sa lower box, P100 sa upper box.
- Latest
