Cacoy Doce pares overall fma fest champion

CEBU, Philippines - Pasidunggan ni  eskrima Supreme Grand Master (SGM)  Ciriaco ‘Cacoy’ Cañete pinaagi  sa usa ka victory party  ang labing menos 40 ka mga sakop sa Cacoy Doce Pares Headquarters  human  sila nahimong  overall champion sa bag-o lang natapos nga FMA Festival Cacoy Doce Pares World Eskrima Tournament didto sa City Sports Club-Cebu sa Cebu Business Park.

Ang victory party ug awarding ceremony himuon ugma sa gabii diha sa Cacoy Doce Pares Headquarters sa dalan C. Padilla, ning siyudad.

Ang Doce Pares Headquarters  mihakot  og  22 ka golds , 13 ka silvers ug 14 ka bronzes gikan sa nagkadaiyang weight divisions.

Mipahiluna  sa  ikaduha  ang Australian team gikan sa International Combative Martial Arts Academy (ICMAA) nga gipangulohan ni Grandmaster Vince Palumbo  nga midaog og unom ka golds, tulo ka silvers ug lima ka bronzes.

Ang  ikatulo nadaog  sa laing grupo sa Australia gikan sa East Coast Doce Pares Institute nga tua magbasi sa Sydney, Australia nga adunay 5-gold, 6-silver ug 1 bronze medals. Gipangulohan kini ni Grandmaster Craig Hayward.

Ang usa ka semanang torneyo gisalmotan sa tanang FMA enthusiasts  gikan sa nagkalain-laing dapit sa kalibotan sama sa United States, Canada,  Europe, Australia, New Zealand, Mexico ug host Philippines.

Atol sa maong torneyo, gipahigayon sab ang 4th Doce Pares Hall of Fame Induction Ceremony nga gipahaum sa  ika-95 nga kasumaran sa adlaw’ng natawhan ni SGM Cañete  niadtong Agosto 8.