UC bantams daog

CEBU, Philippines- Usa ka adlaw human mahiagum og 49-61 nga kapildehan sa co-leader University of San Carlos (USC) Baby Warriors, maoy gipahimungtan sa University of Cebu (UC) Junior Webmasters ang University of Southern Philippines-Foundation (USP-F) Baby Panthers kinsa ilang gilubong sa iskor, 76-50 sa sangka sa high school division sa nagpadayong 14th season sa Cebu Schools Athletic Foundation, Inc. (CESAFI) didto sa  Cebu Colisuem.

Sa preliminary, mikulit sa ilang ikaduhang daog ang Sacred Heart School-Ateneo de Cebu (SHS-AdC) Magis Eagles human ilang gilampurnas ang Cebu Institute of Technology-University (CIT-U) Wildkittens, 78-58.

Nagtabla karon sa unang pwesto ang Magis Eagles, USC Baby Warriors ug UV Baby Lancers sa 2-0 nga baraha samtang ang Junior Webmasters adunay 2-1 nga braha.

Nagpakita sa ilang determinasyon ang UC human makatilaw og pilde sa Baby Lancers ug maoy nagtimon sa opensa ang ilang tulo ka pambato nga silang Darrel Shane Menina, Arvin Dungog og Richestel Isla kinsa pulos mibahug og double figures.

Tulo sab ka Baby Panthers ang mibahug og double figures nga silang John Alocillo, John Bryle Bahio ug Cylde Drexley Avancena. Laing mihimo'g double sa Magis Eagles mao si Andrew Vincent Velasco sa iyang 11 puntos.

Sa sayo pa, si Joshua Sinclair mihimo'g 13 puntos samtang midugang silang Felixberto Jaboneta ug Zachary Lance Eden Huang og 12 puntos matag usa aron pangulohan ang opensa sa Magis Eagles.

Sa habig sa 0-2 nga Wildkittens, maoy nangu si Justin Jules Langres kinsa miposa og 18 puntos ug midugang si Joshua Philip Manatad og 10 puntos.

Ning pagsuwat sa alas 6:30 sa hapon, padayon pang nagsangka ang 1-0 nga CIT-U Wildcats kinsa nagtinguha sa ilang ikaduhang daog nga dugay na kaayong katuigan batok sa UC Webmasters.

Atol sa halftime, naglabaw ang Wildcats sa iskor, 34-23. (BANAT NEWS)

Puntos matag usa:

First Game:

SHS-AdC (Jrs.) 78-  Sinclair 13, Jaboneta 12, Huang 12, Velasco 11, Nacua 9, Araw-Araw 5, Mayol 5, Longa 4, Visser 3, Johnson 2, Co 2.

CIT-U (Jrs.) 58-        Langres 18, Manatad 10, Plaza 9, Berezo 9, Abinuman 6, Pedroza 5.

Second Game:

UC (Jrs.) 76-           Menina 14, Dungog 14, Isla 12, Quiamco 8, Hemida 6, Abejo 5, Molina 4, Gabisan 4, Canonigo 4, Soco 3, Daligdig 2.

USP-F (Jrs.) 50-      Alocillo 11, Bahio 10, Avancena 10, Obenza 8, Dedios 5,Archival 5, Fermin 1, Soon 1.