52 ka eskrimadors pasidunggan

CEBU, Philippines -  Labing menos  52  ka mga eskrimadors ang pasidunggan  sa ipahigayong 4th Cacoy Doce Pares Hall of Fame awards karong alas-7 sa  gabii diha sa Summit Circle Hotel sa  Osmeña Blvd., ning dakbayan.

Lakip sa pasidunggan  ang anak  babaye ni Supreme Grand Master Ciriaco ‘Cacoy’ Cañete nga si Catherine Cañete-Knight, kansang bana usa ka Amerikano.

Pasidunggan sab ang apo ni Cacoy nga si Chuck Anthony Cañete, ang  tournament director sa FMA Cacoy Doce Pares international tournament nga matapos karong hapon  sa City Sports Club-Cebu sa Cebu Business Park.

Si SGM Cañete ang bugtong makadawat sa International Martial Arts Legend tungod kay dili na maihap ang iyang pagtudlo og eskrima didto sa gawas sa nasud lakip sa Asia, Europe, Canada ug sa United States.

Silang Cañete-Knight ug Chuck duha lang sa pito ka awardees alang sa ilang Valuable Contribution in the Promotion of Cacoy Doce Pares. Naglakip kini ni American Grandmaster Anthony Kleeman ug Australian Grandmaster  Vince Palumbo.

Dunay 11 ka eskrimadors ang makadawat sa Exemplary Dedication to Cacoy Doce Pares Award, lima ang Valuable Masters award, upat ka Outstanding Dedication to FMA Award, tulo ka Outstanding Student Award, tagduha ka Notable Law Enforcement Instructor Award,  Valuable  Arts Instructor Award ug sa Excellence in the Promotion of Sports Eskrima.  Tag-usa  alang sa Valuable Cacoy Doce Pares Blackbelt-holder Award,  Outstanding Contribution in the Promotion of the FMA Award,  Humanitarian Award,  Martial Arts Icon Award,  Notable Eskrima Competitor Award  ug  Notable Martial Arts Instructor Award ug usa ka posthumous award.

Ang Hall of Fame awarding ceremonies gitumong sa ika-95 nga kasumaran  nga adlaw’ng natawhan ni Cacoy karong adlawa. (BANAT NEWS)