Lancers mikulata sa Webmasters
CEBU, Philippines - Maoy gipahungawan sa University of the Visayas (UV) Green Lancers sa ilang kapungot ang University of Cebu (UC) Webmasters pinaagi sa pag-iskor og makabungog nga kadaugan, 91-46 sa nagpadayong aksiyon sa 14th Cebu Schools Athletic Foundation Inc. (CESAFI)basketball tournament niadtong Martes sa gabii diha sa Cebu Coliseum.
Ang dakung kadaugan naggikan human ang UV Lancers napilde ngadto sa Cebu Institute of Technology-University (CIT-U) Wildcats atol sa una nilang duwa niadtong Domingo.
Naglagiting sa kainit ang UV, kinsa miugsok og 26-1 human sa first period. Mihinay-hinay unta og kamang sa unahan ang UC Webmasters, apan wala sila makasustenir tungod kay walay hunong nga mipabuhagay og mga puntos ang Lancers.
Nakahimo pa pag-rally ang UC Webmasters sa second period aron tapuson ang halftime, 25-37. Nakan-an pa kini nila ngadto na lang sa 10 puntos, 32-42 human sa three-point play ni Jan Michael Auditor sa nahabiling 6:49 sa third quarter.
Apan misamot hinuon pagburot ang labaw sa Lancers sa katapusang kuwatro minutos sa duwa sa iskor nga 77-44 ug wala na makapaduol pa ang Webmasters.
Upat ka players sa Lancers ang mibahog og double figures nga gipangulohan ni Leonard Santillan sa iyang 15 puntos, gisundan ni Alvin Matthew Oche nga adunay 14 puntos. Sila si John Michael Abad ug Monic Soliva mitimbre’g 13 ug 10 puntos matag usa.
Sa habig sa UC, bugtong si Auditor lang ang mihimo’g double figures pinaagi sa iyang 13 puntos nga layo kaayo’g deperensiya kun itandi sa 36 puntos nga iyang gihakot atol sa ilang 100-94 nga kadaugan batok sa University of San Jose-Recoletos (USJ-R) Jaguars niadtong Sabado. (BANAT NEWS)
- Latest
