Cobra Ironman 70.3 Philippines McMahon, Steffen daog sa Ironman

CEBU, Philippines- Ang Canadian nga si Bruce McMahon ug Swiss nga si Caroline Steffen maoy hari ug reyna sa Cobra Ironman 70.3 Philippines kagahapon didto sa Shangri-La Mactan Resort and Spa sa Lapu-Lapu City.

Si McMahon nakatilaw na gyud sa gihandum niyang kampiyonato pro elite division human sa iyang fifth place finish sa miaging tuig. Ning higayuna, gipaspasan ni McMahon ang paglabang sa finish line diin gitapos niya ang lumba sud sa tulo ka oras ug 59.05 segundos.

Ang Australian-Dutch nga si Sam Betten maoy second placer sa oras nga 4:07:03, samtang si Cameron Brown mitugpa sa ikatulong dapit.

Sa iyang bahin, si Steffen mirehistro og oras nga 4:32:34 aron makuha ang titulo sa women’s class. Ang maong kadaugan magsilbe nga usa ka ‘grandslam’ win ni Steffen human sa ikatulo na niya kining tuig nga gidominaran.

Gasunod ni Steffen mao si Australian Rebecca Hoscke (4:38:34) ug Belinda Granger (4:48:32) alang sa second ug third place.

Sa laing bahin, ang kanhi runner ug karon usa na ka triathlete nga si John Philip Duenas maoy migawas nga labing paspas nga Cebuano human siya mipwesto sa ika-18 dapit sa Filipino elite nga giharian ni August Benedicto.

Laing mga Cebuano nga misulod sa top 10 sa Filipino elite naglakip nila ni Gerrie Calinawa, Joseph Miller, Elmo Clarabal ug Mendel Lopez.

Wa usab magpauwahi ang mga Cebuana triathlete nga sila si Lorhiz Echavez-Lopez, Cianyl Gonzales ug Elona Louise Villacin kinsa impresibo usab sa Filipino Elite class.

Ang trio nila ni Cebu marathon queen Mary Joy Tabal, Keith Ocampo ug Planco Pinpin Uy midaog usab sa mixed relay action. (BANAT NEWS)