Rafols bayani sa S.V.F. Design and Build sa AS-ES B.A.R Caging

CEBU, Philippines - Giluwas ni Francis James Rafols ang S.V.F. Design and Build pinaagi sa pagpatuasik sa iyang krusyal nga 3-pointer sa nahabiling 7.3 segundos sa fourth quarter aron moiskor og daog batok sa Chowking, 73-70 sa As-Es B.A.R. Second Conference Fiesta Cup 2014 niadtong Hulyo 27 diha sa Benjamin  Solon Memorial gym sa Cogon Ramos, Cebu City.
Gawas nga nahimong bayani, si Rafols mao sab ang topscorer sa S.V.F. Design and Build nga gipanag-iya ni Archt. Christian Benedict F. Nellas sa kinatibuk-an niyang 12 puntos.
Si Rafols nakakuha sab og igong suporta gikan nilang Glen Misa, Mac-Mac Ferrer ug  Vergel Fuentes nga miambit og 10 puntos matag usa.
Gibiyaan ang S.V.F. Design and Build sa unang  tulo ka kuwarter ug  mihimo sila’g 28-17 nga rally sa final period aron makawat ang daog.
Si kanhi Sirao barangay councilor Roger Bontoyan mao sab ang nangu sa Chowking nga mikadlit og 12 puntos, samtang sila si Andy Borres ug Art Arellano parehong mitikdol og 10 puntos.
Sa laing duwa, ang R.A. Essentials (Bastida) miiskor sab og daog pinaagi sa paglubong sa Gems, 62-51.
Si Mico Llagas mitusak og 12 puntos, samtang si kanhi CDC White Stallions Rocky Bacalso miposa’g 11 puntos alang sa ikaduhang daog sa R.A. Essentials.
Gipangulohan sab ni Aaron Miñoza ang napildeng Gems pinaagi sa iyang 14 puntos. (BANAT NEWS)

PUNTOS MATAG USA

Unang duwa:
S.V.F. DESIGN AND BUILD (73) – Rafols 12, Misa 10, Ferrer 10, Fuentes 10,  Llanos 9, Deliña 4, Jaime 4, Saballa 4, Cabrera 4, Tancio 2, Donaire 2, Magsayo 2.
CHOWKING (70) – Bontoyan 12, Borres 10, Arellano 10, Tambolero 9, Dela Calzada 8, Antido 8, Sarda 5, Cabantog 4, A. Abella 2, J. Abella 2.

Ikaduhang duwa:
R.A. ESSENTIALS  (70)  – Llagas 12, Bacalso 11, Aniñon 8, Pada 6, Zamora 4, Alcover 4, Bastida 4, Lanutan 4, Sabay 4, Rodriguez 2, Obcial 2, Godiz 1.
GEMS (51)  – Miñoza 14, Bernal 7, Sabal 7, Barrientos 6, Abrio 4, Co 4, Murillo 4, Polar 3, Secuya 2.