CESAFI Season 14 andam na

CEBU, Philippines - Andam na ang tanan alang sa pagbukas sa 14th season sa Cebu Schools Athletic Foundation Inc. (CESAFI) karong Sabado diha sa Cebu Coliseum.  

Pipila pa lang gani ka adlaw sa dili pa ang opening sa  Smart-CESAFI season, daghang nagtuo nga magbagat pag-usab sa finals ang defending champion University of the Visayas (UV) Green Lancers ug ang Southwestern University (SWU) Cobras.

Apan nasayod sab ang Lancers ug ang Cobras nga dili kakompiyansaan ang University of San Jose- Recoletos (USJ-R) Jaguars ug ang University of San Carlos (USC) Warriors.

Ang CESAFI season 14 pormal nga gilusad kagahapon atol sa press conference didto sa Parklane International Hotel. Gipangulohan kini ni commissioner Felix O. Tiukinhoy Jr. ug CESAFI president Fr. Manny Uy, S.J. ug gitambongan sa mga coaches gikan sa nagkalain-laing tunghaan ug sa mga representante  sa Smart pinangulohan ni Pau Dizon.

Matud pa ni Cobras coach Raul ‘Yayoy’ Alcoseba nga nanghinaut siya nga ang nahitabo sa miaging season dili na unta mahitabo pag-usab karon.  Ang SWU nag-una sa series sa best-of-five final series, 2-0, apan giharos sa UV ang nahabiling tulo ka mga duwa aron masakmit ang titulo.

Unom lang ka teams ang magtigi sa seniors division ug kini mao ang UV, SWU, USJ-R, USC,  Cebu Institute of Technology-University (CIT-U) Wildcats ug ang University of Cebu (UC) Webmasters.

Sa secondary, adunay siyam ka teams ang mopakita’g aksiyon, ang  UC Junior Webmasters, USJ-R Baby Jaguars, Sacred Heart School-Ateneo de Cebu (SHS-AdC) Blue Eagles, Cebu Eastern  College (CEC) Dragons,  USC Baby Warriors, UV Baby Lancers, CIT-U Wildkittens, University of Southern Philippines Foundation (USPF) Baby Panthers ug ang Don Bosco Technology Center (DBTC) Greywolves. (BANAT NEWS)