Pinoy pride sa Dubai

CEBU, Philippines- Matuman na gyud ang dugay na kaayong gipangandoy sa ALA Promotions nga mopasiugda’g fight card sa abroad.

Ang ALA Promotions, ang respetadong boxing sa promosyon sa Pilipinas mopahigayon og “Pinoy Pride 27: Duel in Dubai” sa Septiyembre 5 didto sa Dubai World Trade Center.

“Five years is enough for this historic milestone for ALA Promotions,” matud pa ni ALA Promotions President and CEO Michael Aldeguer sa press conference kagahapon didto sa Rajah Park Hotel.

Nagkanayon si Aldeguer, nga naglisud siya pagtuo sa una nga mabuhat kini nila, apan aduna siya’y pagsalig sa ilang abilidad nga mahimo ang makasaysayanong event sa ALA Promotions.

“Bringing big fights abroad with Filipino boxers is something very historic for Philippine boxing,” matud pa niya.

Gawas sa taas nga panahon sa pagplansa, si Aldeguer miangkon nga dakung gasto usab ang ilang gibubo aron lang mahitabo ang maong event. Apan alang kaniya mabawi ra kini ilabi na sa nindot nga reaksyon nga nadawat na nila pagsugod gikan sa mga Pinoy OFWs didto sa Dubai.

Sa labing una nilang fight card sa gawas sa nasud, ang undefeated super bantamweight prospect nga si  Genesis ‘Azucal’ Servania (24-0, 10KOs) modepensa sa iyang WBO Intercontinental title batok ni Mexican challenger Jose ‘Matador’ Cabrera (22-4, 10KOs) sa main event.

Ang taga-Bacolod City maoy rank No. 2 sa WBO ug posible nga mahimo siyang mandatory challenger batok ni Cuban champion Guillermo Rigondeaux, apan tan-awon una ni Aldeguer  ang labok ni Servania  didto sa Dubai.

Sa supporting bout, laing undefeated ALA boxer nga si ‘King’ Arthur Villanueva (25-0, 14KOs) mosuway pag-ilog sa bakanteng IBF International junior bantamweight belt batok ni Nicaraguan Henry ‘El Crespo’ Maldonado (18-3, 13KOs).

Sa laing attraction, ang crowd-favorite nga si Rey ‘Boom Boom’ Bautista (35-3, 25KOs) moaway sa ikaduhang higayon sa super featherweight division batok ni Mexican Jose ‘Piquet’ Martinez (19-1, 15KOs). (BANAT NEWS)