19TH SHAABAA cup andam na

CEBU, Philippines - Buksan na karong Domingo ang 19th season sa Sacred Heart Ateneo Alumni Basketball Athletic Association nga giuloha’g  “The Avenir SHAABAA Cup” diha sa Lex Oriens gym sa Ateneo de Cebu sa barangay Canduman, Mandaue City.

Ang opening ceremoy sugdan sa ala-1:30 sa hapon.

Sa labing unang higayon sukad kini natukod niadtong 1995,  ang mga partisipante gibuwag ngadto sa duha ka dibisyon ug duha sab ang mahimong kampiyon karon nga season.

Adunay 15 ka teams ang mopakita’g aksiyon niini nga edisyon sa labing karaan nga alumni basketball sa Sugbu.

Siyam ka teams ang naglangkob sa Group A mao ang  Goldberry Iloilo Hotel (former Goldberry Suites) ang kampiyon sa miaging tuig uban sa Cebu Landmasters,  Colours, Gaisano Capital, Insular Square  Titans, RDAK Stallions, San Jose Bakeshop ug Twin Tower Farms.

Ang mga teams sa Division B mao ang Shakey’s (Batch 2014), Belo Men 98 Echo Appliances, Chick @ Phi 89, RDAK-B ug White Gold Club.

Ang torneyo mosubay og single round robin format sa Division A ug double round robin sa Division B sa elimination round. Ang top-ranked teams human sa classification phase moabante sa semifinals. Ang finals sa duha ka dibisyon ipaagi sa “best-of-three” series.

Ang Avenir SHAABAA Cup gilusad  pinaagi ni Sacred Heart Alumni President Jose  Franco B. Soberano ug SHAABAA president Kevin Lim atol sa press conference kagahapon didto sa Big Mao restaurant sa Ayala Center-Cebu.

Si Soberano miingon nga ang SHAABAA dili kay sa basketbol lang, apan aktibo sab silang nalambigit sa mga charitable projects.

Ang katuyoan sa pagtukod sa SHAABAA mao ang pagpalambo sa panaghigalaay ug ingon man physical fitness. (BANAT PALARO)