Russell balik sa normal kondisyon

CEBU, Philippines - Mibalik na sa normal ang kondisyon ni Hall of Famer Bill Russell human siya makuyapi samtang nagdiskurso didto sa Lake Tahoe, sumala pa sa team officials sa Boston Celtics.

Ang team spokesman sa Celtics nga si Brian Olive nagkanayon nga ang 80-anyos nga si Russell kalit lang gikuyapan  niadtong Huwebes didto sa Hyatt Regency Resort sa Incline Village, Nevada.

Ang saksi nga si Michael Rooney mitug-an ngadto sa The Associated Press nga si Russell naghisgot og sugilanon kalabot kang Wilt Chamberlain atubangan  sa mga empleyado sa Konica Minolta, apan kalit lang siyang  natumba.

Si Russell kinsa midaog og lima ka NBA MVP, giila nga usa sa labing maayong player sa kasaysayan.

Midaog siya’g 11 ka championships sa iyang 13 ka tuig isip sentro sa Celtics.  Isip player-coach, siya maoy unang  itom  nga coach sa usa ka major  U.S. pro sport.

Gituboy siya ngadto sa Hall of Fame niadtong 1975 ug gihatagan og Presidential Medal of Freedom niadtong 2010. Gipasidunggan sa miaging tuig pinaagi sa pagpabarog og estatwa sa gawas sa Boston City Hall. (BANAT NEWS)