Boyose Singwangcha mobida sa ABF title fight
CEBU, Philippines - Ang way pildeng Sugbuanong boksidor nga si Boyose A. Singwangcha makigsangka ni Niño Val Falcunaya sa Lipa City, Batangas alang sa Asian Boxing Federation super featherweight title sa main event sa laing dakung boxing card nga gipasiugdahan sa Naris/Wakee Promotions sa Agosto 2 diha sa Tabunok Sports Complex, Talisay City.
Si Singwangcha, kinsa nailang Ardie Boyose sa wala pa siya biraha ni Thai boxing patron Naris Singwangcha, adunay 11 ka professional fights diin pito sa iyang daog pinaagi sa knockout. Ang garbo sa San Remigio, Cebu mipatumba sa iyang katapusang unom ka kaatbang sud lang sa duha ka rounds, ang katapusan mao ang first-round stoppage ni Elmer Colve niadtong Mayo didto sa Saint Joseph College of Sindangan Gymnasium sa Sindangan, Zamboanga del Norte.
Sa supporting bouts, laing duha ka boksidor sa Naris nga si Tabanao Singwangcha sa Panabo City, Davao ug Canoy Singwangcha sa General Santos City makigsinukliay og kumo batok sa tagsa-tagsa nilang kaatbang.
Si Tabanao moharong ni John Gemino sa Lipa City sa ilang 10-round featherweight fight, samtang si Canoy makigbatok ni JR Salvador sa Phil-Aust gym sa eight-rounder lightweight duel. Lain pang moaway sa boxing card nga gipresentar sab sa Talisay City Sports Commission ug sa GMA-7 Kapuso network mao sila si Kenny Demecillo vs. Rogen Flores, Katiandagho Singwangcha vs. Rodel Wenceslao, Elias Joaquino vs. Robert Awitin ug Melmark Dignos vs. Albert Mering. (BANAT NEWS)
- Latest
