Reyes wa matagbaw sa Gilas
CEBU, Philippines - Daghan pa og butang nga angay palambuon ang Smart Gilas Pilipinas bisan pa sa ilang 78-64 nga kadaugan batok sa Chinese Taipei niadtong Sabado sa opener sa 2014 FIBA Asia Cup didto sa Wuhan, China.
Kini ang nakita ni Gilas coach Chot Reyes kinsa naalarma sa daghang turn-overs sa iyang koponan rasun nga nahimong sikit ang duwa batok sa Chinese Taipei sa wala pa sila makahimo og rally sa final period.
Gawas sa turn-overs, wala usab mahimuot si Reyes sa foul-trouble ni PBA MVP Junemar Fajardo. “Bad: 26 turnovers, Fajardo’s foul trouble, fastbreak execution,” matud pa ni Reyes sa Spin.ph.
Si Reyes gusto og mas nindot og limpyong kadaugan gikan sa Gilas karong adlawa ilabi na nga huyang nga Singapore ilang ikasangka. Ang Gilas laraw nga makahimo og 2-0 record batok sa mga Singaporean karong alas-2:45 sa hapon.
Kahigayunan usab karon sa Gilas nga makapangandam alang sa mas dakung duwa sa Martes batok sa Jordan nga gi-coach karon sa kanhi Gilas mentor nga si Rajko Toroman.
Ang national team gusto nga makapakita og nindot nga kampanya sa Asia Cup sa dili pa sila mularga sa Spain sunod buwan alang sa FIBA World Cup. (BANAT PALARO)
- Latest
