Red team segurado na sa quarterfinals

CEBU, Philippines - Midayon na sa quarterfinals ang Red team human  sila makaipsot sa laang sa team Violet, 69-66 sa nagpadayong SRP Sunday Club 6th Founding Anniversary League basketball tournament didto sa San Roque Parish gym sa barangay Subangdaku, Mandaue City.

Sa kasamtangan, ang Red nahimutang sa kinatumyang dapit sa standing uban sa Maroon-JIB Autoparts ni Alex Tecson sa managsama nilang 4-0 win-loss records.

Si Glenn Ramirez miiskor og 12 puntos, samtang si  Renato Conahap miamot og 10 puntos aron pangulohan ang Red nga mi-rally sa nahabiling dos minutos sa fourth quarter aron mahakop ang ligas kaayong kadaugan.

Gawas  nilang Ramirez ug Conahap, laing 11 nila ka teammates ang  mihimo'g puntos alang sa balanseng ataki sa Red team.

Sakit kaayo alang sa Violet ang maong kapildihan gumikan kay sila man ang nagkontrolar sa duwa gikan sa pagsugod hangtod na  sa final quarter, apan mikolapso sa daginutong oras sa duwa.

Ang Violet nga nagtangag karon og 2-2 nga baraha gipangulohan ni Andrian Auxtero, kinsa miantog og 17 puntos. (BANAT NEWS)

PUNTOS MATAG USA

RED (69) – Ramirez 12, Conahap 10, Miñoza 8, Migallen 7, Arreglo 6, Villarin 4, Colanse 4, Survilla 4, Dy 5, Fontanosa 3, Castañeda 2, Fick 2, Amora 2.

VIOLET (66) – Andrian 17, Gonzaga 10, Gabison 7, Rosaroso 6, Pacencia 6, Camargo 6, Flores 4, September 4, Andrew 3, Colina1.