Orange nakarekober, Maroon, 4-0 na

CEBU, Philippines - Gibayran ni Glen 'Dodod' Colina ang pagpalta niya'g usa dihang iyang gipangulohan ang Orange team ngadto sa kadaugan batok sa Gray, 97-85 sa SRP Sunday Club 6th Founding  Anniversary League basketball tournament niadtong Domingo didto sa San Roque Parish gym sa barangay Subangdaku, Mandaue City.

Ang  leading scorer sa Orange nga si Colina mikadlit og 19 puntos uban ang lima ka rebounds ug duha ka steals alang sa iyang koponan nga wala na molingi pa human molabaw, 56-55 sa tunga-tungang bahin sa third period.

Mitakod sab ang kainit ni Colina ngadto nilang Ohing Ortiz, Monching Menaling, Ritchie Tecson ug Gideon Ipili nga mitikdol sab og double figures alang sa ilang 3-1 win-loss record.

Ang  Gray nga gipaluyohan sa Romgen Upholstery nilabaw unta og 17 puntos sa halftime, 47-30, apan nahilis kini sa third period dihang nahimong upat-lima ang duwa kay sayong migradwit si SRP Sunday  Club president Rom Castañeda sa maong  kuwarter.

Ang basket ni Menaling maoy naghatag sa Orange sa labing unang labaw, 48-47. Gumikan sa maong partida, miburot ang labaw sa Orange ngadto na sa 13 puntos paingon sa final period.

Ang three-point shot ni Colina maoy hingpit miselyo sa daog sa Orange.

Si Ortiz miamot og 17 puntos lakip na ang talagsaong four-point play, si Menaling mikandos og 14 puntos, samtang sila si Tecson ug Ipili mitimbre'g 13 ug 12 puntos matag usa.

Sa gilauman, sila si Marcial Marturillas ug Toto  Cabrillas mao gihapon ang nangu sa Gray nga adunay 16 puntos matag usa.

Gisundan ni Joel Dublin sa iyang 11 puntos ug Romy Gastardo nga adunay 10 puntos.

Sa laing aksiyon, ang Maroon-JIB nga gipanag-iya ni Alex Tecson nagpabiling way pilde sa upat ka duwa human midaog batok sa team Black-John Quin, 95-89.

Ang 11 puntos ni Tecson  sa fourth quarter maoy migarantiya sa kadaugan sa iyang team, apan si Benito Aton Jr. maoy topscorer sa Maroon pinaagi sa iyang 16 puntos, gisundan nilang Fernando 'Pitpit' Anghay ug Eric Obra nga adunay 14 puntos matag usa.

Nakatabang sab og daku sa maong kadaugan si Fredo Santome pinaagi sa iyang solidong depensa.

Si Arnel Chin mitikdol og 16 puntos aron maoy mangu sa Black, samtang laing tulo niya ka teammates ang miiskor sab og double digits.

PUNTOS MATAG USA

Unang duwa:

MAROON (95) – Aton 16, Anghay 14, Obra 14, Tecson 11, Aniñon 8, Colina 8, Cabunilas 6, Labastida 6, Caballero 4, Rodriguez

3, Cortes 3, Ontog 2.

BLACK (89) – Chin 16, Lauron 15, Dumanon 14, Sasing 10, Cabcaban 8, Povadora 6, Mejares 6, Benson 5, Narte 3, Coyme 2,

Ybañez 2, Enriquez 2.

Ikaduhang duwa:

ORANGE (97) – Colina 19, Ortiz 17, Menaling 14, Tecson 13, Ipili 12, Gonzaga 6, Perolino 4, Aventajado 3, A. Cariño 3, Peligro 2,

C. Cariño 2.

GRAY (85) – Marturillas 16, Cabrillas 16, Dublin 11, Gastardo 10, Lepiten 9, Pon 7, Lobidica 5, Rico 4, Cajes 4, Castañeda 3. (BANAT PALARO)