Farenas mi-KO ni Davis

CEBU, Philippines - Nagkahayag ang damgo ni Filipino super featherweight contender Michael 'Hammer Fist' Farenas (38-4, 30KOs)  nga mahimong world champion human siya miiskor og eight round TKO batok sa kanhi way pildeng si Mark 'Too Sharp' Davis (18-1, 5KOs) kagahapon didto sa Foxwoods Resort sa Connecticut.

Ang maong sangka usa ka IBF world title eliminator diin ang modaog maoy moaway alang sa IBF world championship batok sa modaog sa showdown tali nila ni reigning champion Argenis Mendez sa Dominican Republic ug Cuban Rances Bartahlemy nga magsangka karong Hulyo 10.

Ang 30-anyos nga si Farenas mipahamtang og gisi sa tuong kilay ni Davis atol sa first round nga nakahatag niya'g pabor. Iyang gipabarag ni Davis sa fifth round, apan ang Amerikanong boksidor nakarekober. Sa eight round, wala na makaagwanta si Davis ug nalup-og kini human atakiha'g  maayo ni Farenas. Tungod niini, si referee Steve Smoger napugos pag-undang sa away sa 0:59 sa maong round.

Sa maong kadaugan, ang  taga-Sorsogon nga si Farenas nahimo usab nga rated No. 2 sa IBF super featherweight ranking.  (BANAT PALARO)