Daghang Bisdak line-up sa FEU Tamaraws
CEBU, Philippines - Labing menos tulo ka players gikan sa Sugbu ang moduwa sa Far Eastern University (FEU) Tamaraws 77th UAAP season karong Hulyo 12 didto sa Mall of Asia Arena.
Nakadawat na ang Tamaraws sa pagdungan og kawagtang sa ilang duha ka pambatong pointguards nga silang Ryan Roose Garcia ug Terrence Romeo nga atua na nagduwa sa PBA ubos sa Global Port Batang Pier.
Ang tulo ka Sugbuanon mao silang Arnie Christian Padilla gikan sa Sacred Heart-Ateneo de Cebu (SHS-AdC), Reeve Ugsang sa University of the Visayas (UV) ug si Francis Tamsi, kinsa nakaduwa'g makadiyot sa University of Cebu (UC).
Kompiyansa lang gihapon si FEU head coach Nash Racela nga makakita gihapon sila og dugang mga maayong players gikan sa laing dapit dinhi sa nasud.
Gani ang ilang pambato ug ang nahibiling beterano sa team nga si Mac Belo gikan man sab sa probinsiya kaniadto diin usa siya sa mapasigarbohong produkto sa St. Mary's Academy sa Cotabato.
Ang 6-foot-3 forward daku kaayo'g kausaban sa unang tulo ka tuig niya isip sakop sa Tamaraws ilabi na kay nalakip siya sa Sinag Pilipinas nga midaog og gold medal sa miaging tuig atol sa Southeast Asian Games didto sa Nay Pyi Taw, Myanmar.
Laing Bisaya nga gikuha ni Racela mao si Augus Vince Denila sa Ateneo de Iloilo. Anaa sab kanila ang taga- Sorsogon nga si Billy Joel Belga, manghod ni Rain or Shine center Beau Belga.
Mibalik sab sa FEU ang kanhi Baby Tam ug kanhi RP Youth standout nga si Richard Escoto. (BANAT NEWS)
- Latest
