Mangosong hari sa 3RD leg man and machine series

CEBU, Philippines - Gipamatud-an ni Mindanao rider Rhowell 'Bornok' Mangosong nga aduna siya'y posisyon sa pagdaog batok sa Cebuano daredevil nga si  Jon Eleazar Adlawan dihang iyang nasakmit ang pro open title sa 3rd leg sa Man and Machine Supercross series 2014 niadtong Domingo didto sa Canlaon City, Negros Oriental.

Si Mangosong sikit kaayong nakiglumba ni Adlawan atol sa unang hut-ong pa lang,  apan kalit kining misutoy sa final lap aron makuha ang korona.

Laing Sugbuanong rider nga si Jubenile Abellar mipuwesto sa ikatulo, samtang ang  beteranong si Ambo Yaparcon ug JB Bacabac maoy mikompleto sa top five finishers.

Miiskor og double-victory si Mangosong  human  sab siya manghawod sa  pro lite title division  batok gihapon ni Adlawan.  Si Chris Bandigan miangkon sa ikatulo. Sila si Abellar ug Yaparcon mi-okupar  sa ikaupat ug ikalimang dapit.

Namawi hinuon si Yaparcon dihang gisakiyo  ang intermediate class title batok nila ni Bandigan ug Jacob Orbe. Si JR Gugudan maoy hari sa beginners class, samtang si Bandigan nag-una sa novice category.

Lain pang mga division winners mao sila si Jason See (open enduro), Jordan Lorena (local enduro), Pepo Rubi (veterans A), Jorlan Bandigan (veterans B), Elton See (veterans C), Shaun Peralta (peewee 50), BJ Pepito (peewee 65), Philip Angelo Leonardo (mini) ug Marielle Mae Villafuerte (women's open).

Sa laing bahin ang fourth leg sa maong motocross race gitakda Hulyo 19 didto sa Badian, Cebu. Ang lumba gisuportahan sa Kopiko Astig 3-in-1, RUSI, Kawasaki ug Petronas Lube and oil.  (BANAT PALARO)