Servania, Bautista mobida sa Pinoy Pride 27 sa Dubai
CEBU, Philippines - Usa siya sa gitan-aw nga title contender sa ALA Gym, apan ang undefeated nga si Genesis 'Azucal' Servania (24-0, 10KOs) buot pang mopamatuod sa iyang abilidad sa mas daku nga entablado sa boksing.
Matuman kini kun modaog siya sa iyang sangka batok ni former two-time world title challenger Jose 'Matador' Cabrera (22-4, 10KOs) sa Mexico sa main event sa "Pinoy Pride 27: Duel in Dubai" sa Agosto 29 didto sa Dubai International Convention Centre.
Si Servania, kinsa gibayaw nga WBO Asia Pacific "Fighter of the Year" mosugal sa iyang WBO Intercontinental super bantamweight title sa maong sangka.
"Gawas nga sa Dubai siya moaway, importante sab ni nga away niya kay top caliber iyang kontra," matud pa ni ALA chief trainer Edito Villamor.
Si Servania mao ang usa sa mga ALA boxers nga adunay dakung kahigayonan nga mokampiyon.
Nasuwayan na siya batok sa mga beterano ug kanhi world champions nga iyang gipangpukan sama nila ni Mexican Genaro Garcia, Angky Angkotta, Rafael Concepcion ug ang labing uwahi si Alexander Muñoz sa Venezuela.
Sa supporting main event, si Rey 'Boom Boom' Bautista (35-3, 25KOs) padayon sa iyang pagbangon sa iyang karera sa iyang pakigharong ni Mexican Juan Jose 'Piquet' Martinez (19-1, 15KOs) sa 10-round non-title bout.
Laing unbeaten ALA warrior nga si 'King' Arthur Villanueva (25-0, 14KOs) mosukod sa abilidad ni Nicaraguan Henry 'El Crespo' Maldonado (18-3, 13KOs) alang sa bakanteng IBF International junior bantamweight belt. (BANAT NEWS)
- Latest
