Haya mao na lang paglaum sa 'Pinas
CEBU, Philippines - Bugtong si Elmer Haya na lang ang Pinoy pool player nga nagbarog aron moduwa sa WPA World 9-ball Championship didto sa Al Saad Sports Club sa Doha, Qatar.
Ang taga-Butuan City nga si Haya mao na lang ang adunay kahigayonan nga modaog sa $30,000 grand prize money sa torneyo. Iyang gitagak ang kababayan niyang si Johann Chua, 11-8, aron moabante sa semifinals.
Sunod sangkaon ni Haya mao ang taga-Netherland nga si Neils Feijen alang sa finals berth. Ang modaog maoy makigsangka sa modaog sa duwa tali nilang Chang Yu Lung sa Taiwan ug Albin Ouschan sa Austria.
Sa laing bahin, ang Sugbuanon nga si Antonio 'Gaga' Gabica, kinsa finalist sa miaging tuig, igo lang nakasud sa last 16 human pildeha si Ryu Seung Woo sa Korea, 11-6, sa wala pa siya mapukan ni Ouschan, 11-7.
Si Carlo Biado, ang semifinalist sa miaging tuig gitagak usab ni Feijen, 11-7 sa quarterfinals.
Gidemalas usab ang taga-Bacolod City nga si Ramil Gallego ug natagak human mapilde ngadto sa Dutch nga si Nick Van Den Burg, 11-7.
- Latest
